Írar skerða möguleika útlendinga

Írskir kjósendur samþykktu í þjóðaratkvæðagreiðslu tillögu ríkisstjórnarinnar um að skerða möguleika útlendinga á að hljóta ríkisborgararétt. Enda þótt niðurstaðan hafi verið talin afgerandi þar í landi, hefði hún ekki verið talin gild, ef ýmsar hugmyndir um þjóðaratkvæðagreiðslu hér á landi hefðu verið til hliðsjónar. Til þessa hafa öll börn sem fæðast á Írlandi fengið sjálfkrafa írskan ríkisborgararétt, burtséð frá því hvort foreldrarnir eru írskir eða útlendir. Stjórnvöld halda því fram, að fjöldi fólks utan Evrópusambandsins, hafi komið til Írlands gagngert til að eiga þar börn, en þegar hið nýfædda barn fái írskan ríkisborgararétt, fylgi foreldrarnir í kjölfarið. Þannig hafi fólk farið bakdyramegin að Evrópusambandinu. Stjórnarskrárbreytingin fellur þetta ákvæði úr gildi og er Írland síðasta landið sem takmarkar réttindi útlendinga með þessum hætti. Miklar umræður voru í landinu, þar sem mannréttindasamtök töldu breytinguna fela í sér kynþáttamisrétti. En það er annað sem er athyglisvert við þessa atkvæðagreiðsu. Nú þegar þjóðaratkvæðagreisla er í undirbúningi hér á landi, er ekki úr vegi að skoða hvernig slík atkvæðagreiðsla fór fram á Írlandi. Undanfarna daga og vikur hafa komið fram ýmsar hugmyndir um að hér þurfi að setja lög um aukinn meirihluta í þjóðaratkvæðagreiðslu, og hafa tvær hugmyndir verið sérstaklega áberandi. Önnur hugmyndin, sem kennd hefur verið við Björn Bjarnason eða Guðna Ágústsson og ýmsir fleiri hafa tekið undir, miðar að því að kjörsókn þurfi að vera að minnsta kosti 75 prósent. Þá hafa aðrir rætt um, að til hafna lögum frá Alþingi þurfi að minnsta kosti helmingur atkvæðabærra manna að greiða því atkvæði sitt. Í þjóðaratkvæðagreiðslunni á Írlandi er hvorugt þessara skilyrða uppfyllt, og þar með hefði atkvæðagreiðslan verið ógild, ef þessar hugmyndir væru einnig uppi á borði á Írlandi. Kjörsókn var 57 prósent og því langt undir 75 prósenta markinu. Af þessum 57 prósentum sem kusu, sögðu tæplega 80 prósent já, sem þýðir að um 45 prósent atkvæðabærra manna samþykktu tillöguna, eða minna en helmingur. Það taldist mjög afgerandi niðurstaða á Írlandi, en hefði ekki dugað samkvæmt fyrrgreindum hugmyndum hér á landi.