Fortíð CIA-stjóra á huldu

Porter J. Goss, sem tilnefndur var í gær sem næsti forstjóri bandarísku leyniþjónustunnar CIA, var leyniþjónustumaður í Mið-Ameríku á miklum umbrotatímum í bandarískum öryggismálum á 7. áratugnum. Margt er á huldu um fortíð Goss sem verið hefur formaður leyniþjónustunefndar bandaríska þingsins. Goss gekk til liðs við CIA árið 1960 eftir að hafa lokið háskólagráðu í grísku frá Yale-háskólanum. Hann vann að leynilegum verkefnum í Mexíkó, í Dóminíkanska lýðveldinu og á Haítí en ekki liggur ljóst fyrir hversu langi hann dvaldi á hverjum stað. Á þessum tíma var Kúba í brennidepli bandarískrar utanríkisstefnu og Kalda stríðið stóð sem hæst. Kastró hafði nýlega náð völdum og skyndilega höfðu Sovétríkin eignast samherja aðeins 145 kílómetra frá ströndum Bandaríkjanna. Goss starfaði meðal annars í Miami þar sem kúbverskir andspyrnumenn hópuðust saman. CIA sá um að skipuleggja starf þeirra og þjálfa þá til hernaðaraðgerða gegn Kastró. Sú vinna skilaði ekki tilætluðum árangri og hin misheppnaða Svínaflóainnrás árið 1961 var leyniþjónustunni mikið áfall. Í viðtali árið 2002 greindi Goss frá því að hann hefði tekið þátt í því að fá landflótta Kúbverja til liðs við CIA. Árið 1965 réðust bandarískar hersveitir inn í Dóminíkanska lyðveldið af ótta við að sagan frá Kúbu endurtæki sig, en Dóminíkanska lýðveldið var eitt þeirra landa þar sem Goss vann að leynilegum verkefnum. Goss fór frá Mið-Ameríku til Lundúna undir lok 7. áratugarins en í heimsókn til Bandaríkjanna árið 1970 var hann hætt kominn vegna blóðeitrunar og hætti störfum hjá CIA ári seinna. George W. Bush lét svo ummælt þegar hann tilnefndi Goss í stöðu forstjóra CIA að þar væri kominn maður sem þekkti starfsemi leyniþjónustunnar inn og út. Tilnefningin á eftir að hljóta staðfestingu bandaríska þingsins og búist er við því að þingið muni þjarma að Goss að gefa nánari upplýsingar um fortíð sína á 7. áratugnum.