Danir vilja hvalveiðar að nýju

Danir ætla að leggja fram tillögu í Alþjóða hvalveiðiráðinu sem á að liðka fyrir því að hvalveiðar í viðskiptaskyni geti hafist að nýju eftir tæplega tveggja áratuga hvalveiðibann. Samkvæmt fréttum á vefsíðu Politiken í Danmörku hefur tillögu þar að lútandi verið dreift til aðildarríkja ráðsins fyrir fund þess sem fram fer síðar í vikunni. Í henni leggur formaður ráðsins, Daninn Henrik Fischer, til að veiðar fari einungis fram á svæðum innan landhelgi þeirra ríkja sem veiðarnar stunda og að eftirlitsmenn verði um borð í öllum hvalveiðiskipum. Þá verða einnig settar upp DNA-skrár og framkvæmdar markaðsrannsóknir sem tryggi að ekki verði verslað með ólöglegt hvalkjöt. Búast má við að mörg dýraverndunarsamtök bregðist ókvæða við þessum tillögum en þau vilja mörg hver friða allar hvalategundir, burt séð frá því hvort þær séu í útrýmingarhættu eða ekki.