Þjóðverjar drekka mestan bjór

Þjóðverjar drekka mestan bjór Evrópubúa en hver Þjóðverji drekkur að meðaltali 120 lítra af bjór árlega. Þjóðverjum tókst því að skjóta Bretum ref fyrir rass en hver Breti drekkur rétt rúmlega hundrað lítra á ári samkvæmt nýrri evrópskri markaðskönnun. Spænski bjórmarkaðurinn stækkar hraðast ár frá ári auk þess sem bjórneysla Ítala eykst hratt. Þá kom í ljós að Frakkar kjósa ennþá fremur vín en bjór. Þrátt fyrir það er eftirspurn eftir gæðabjór alltaf að aukast þar í landi.