Stríðsglæpir í beinni

Stríðsglæpir og afstaða Íslendinga - Eiríkur Bergmann Einarsson Á meðan okkar ágæti utanríkisráðherra sat í djúpum hægindastólnum í bandaríska utanríkisráðuneytinu og sötraði te með Colin Powell, fráfarandi utanríkisráðherra Bandaríkjanna, sýndu sjónvarpsstöðvar úti um allan heim myndskeið sem tökumaður bandarísku NBC-sjónvarpsstöðvarinnar tók og sýnir bandarískan hermann drepa óvopnaðan Íraka sem lá hreyfingarlaus á gólfinu í mosku í Falluja. Utanríkisráðherra herlausu smáþjóðarinnar í norðri hafði á þessum einkafundi sínum með bandaríska stallbróður sínum einstakt tækifæri til að mótmæla stríðsglæpum Bandaríkjanna eins og áttu sér stað í moskunni og í Abu Ghraib-fangelsinu svo dæmi sé tekið, en ætli megi ekki telja líklegt að slík grimmdarverk séu einnig framin þegar myndavélarnar eru hvergi nálægar. Ætli utanríkisráðherrann okkar, sem hafði þessa einstöku aðstöðu til að koma óhug þjóðar sinnar á framfæri, hafi ekki örugglega gripið tækifærið? Af fréttum að dæma virðist svo ekki hafa verið, var víst of upptekinn við að væla út framlengingu á veru þessara fjögurra F-15 orrustuvéla sem enn eru á Keflavíkurflugvéli. Og það þótt þær séu að sönnu vitagagnslausar og þar með óþarfar. Og það sem meira er; utanríkisráðherrann og íslensk stjórnvöld almennt virðast, öfugt við almenning í landinu, barasta ekki hafa neinar athugasemdir við ólögmæta hryllingsför Bandaríkjahers í Írak. Settu okkur meira að segja á lista yfir hinar viljugu stríðsþjóðir og sjá enga ástæðu til að láta af stuðningi okkar við ólögmæta herförina þrátt fyrir að allir viðurkenni nú orðið að forsendur stríðsins voru í besta falli byggðar á kolröngum upplýsingum og að öllum líkindum á hreinum og klárum blekkingum. En allt kom þetta fyrir ekki; utanríkisráðherrann sat sáttur í sinni og sötraði sitt te. Enda raunar ákafari stuðningsmaður stríðsins en sá sem á móti honum sat, sjálfur Colin Powell, fráfarandi utanríkisráðherra Bandaríkjanna. En efasemdir hans um nauðsyn þess að ráðast rakeiðis inn í Írak þegar þeir náðu ekki honum Osama í fjöllunum í Afganistan hafa nú kostað hann ráðherrastólinn.