Slipknot á Hróarskeldu

Harðkjarnasveitin grímuklædda Slipknot hefur verið bætt á dagskrá Hróarskelduhátíðarinnar í ár. Þeir eiga að verða nokkurs konar sárabót fyrir það að David Bowie skyldi hafa hætt við tónleika sína á hátíðinni vegna meiðsla. Læknir hans bannaði honum að koma fram þar sem gamla kempan er með klemmda taug. Dagskráin tekur stöðugt breytingum þessa dagana og afboðaði breska sveitin Syntax spilamennsku sína á hátíðinni í gær. Enn er óvíst hvort Muse spili. Trommarinn missti föður sinn um síðustu helgi og hefur sveitin afboðað nokkra tónleika í kjölfarið. Þegar þetta var skrifað hafði þó sveitin enn ekki afboðað tónleikahald á Hróarskeldu. Búast má við því að aðstandendur Hróarskeldu bæti við nokkrum tónlistaratriðum til viðbótar, en hátíðin hefst formlega í dag.