Notaði innsæið í Medulla

"Hljóðfæri eru búin að vera," segir Björk Guðmundsdóttir um nýjustu plötu sína, Medulla, sem kemur út í lok ágúst eða byrjun september. Platan er eingöngu unnin með röddum og engin hljóðfæri fá að njóta sín. "Ég held ég hafi aldrei notað innsæi mitt meira en á þessari plötu," segir Björk. "Ég þurfti að nota hluti sem ég gat treyst, eins og röddina mína, vöðvana og beinin. Ég gat eiginlega ekki notað neitt annað." Raddlistamaðurinn Rahzel býr til bassataktinn fyrir meirihluta laganna auk þess sem inúítinn Tany Tagaq sér um raddir. Einnig kemur við sögu Mike Patton, fyrrum liðsmaður Faith No More, sem nýlega kom hingað til lands með hljómsveit sinni Fantomas. Á meðal laga á Medulla verða Where Is the Line og The Pleasure Is All Mine. Eftir að platan verður gefin út ætlar Björk að halda áfram í hljóðveri og vinna að sinni næstu plötu í stað þess að fara í tónleikaferð eins og venjan hefur verið. "Núna gæti ég örugglega samið plötu á fimm mínútum," segir Björk. "'Mig langar að sjá hvort það sé bara óskhyggja eða hvort það eigi við rök að styðjast."