Þrír djassarar

Þeir Erik Qvick trommuleikari og Ásgeir Ásgeirsson gítarleikari eru íslenskum djassáhugamönnum að góðu kunnir, bæði sem meðlimir í orgeltríóinu B3 og fyrir leik sinn með hinum og þessum djasshljómsveitum síðustu misserin. Í síðasta mánuði kom hingað til lands sænski kontrabassaleikarinn Thomas Markusson, og héldu þeir þrír þá tónleika undir nafni Erik Qvick tríó. Nú er Thomas kominn aftur, og ætla þeir þremenningarnir að halda í svolitla tónleikaferð um landið. Að þessu sinni kalla þeir sig MÁQ tríó, eða Markusson/Ásgeirsson/Qvick tríó. Fyrstu tónleikar þeirra verða í kvöld á Caffé Kúltúre, sem er í Alþjóðahúsinu við Hverfisgötu. Á morgun verða þeir svo komnir til Húsavíkur þar sem þeir spila á Gamla bauk. Sautjánda og átjánda júní verða þeir síðan með tónleika við Mývatn.