Stórmeistarajafntefli á Highbury

Einum stærsta leik ensku úrvalsdeildarinnar á þessari leiktíð, leik meistara Arsenal og Chelsea, lauk með jafntefli 2-2 eftir æsispennandi 90 mínútur á Highbury í gær. Gríðarlegur hraði einkenndi leikinn frá upphafi til enda og verður að telja úrslitin sanngjörn miðað við gang hans. Henry skoraði bæði mörk heimaliðsins en Terry og Eiður Smári jöfnuðu fyrir þá bláklæddu. Fyrri hálfleikur gat ekki byrjað með betri hætti þegar Thierry Henry skoraði fyrsta markið fyrir Arsenal þegar aðeins rúm mínúta var liðin af leiknum. Markið kom nánast út úr engu þegar boltinn endaði hjá Henry eftir skyndisókn og lyfti hann knettinum af ísköldu öryggi fram hjá Cech, markverði Chelsea. Markið galopnaði leikinn og er langt síðan jafnmikill hraði sást í knattspyrnuleik á enskri grund. Hófu leikmenn Chelsea strax gagnsókn og sextán mínútum seinna endaði knötturinn í neti Arsenal eftir skalla frá markamaskínunni John Terry. Kom markið eftir hornspyrnu Robben en enginn vaktaði Terry sem þó hefur skorað grimmt undanfarið. Aðdáendur Arsenal gátu þó fljótlega andað léttar á ný á 29. mínútu þegar Henry skoraði aftur og kom liði sínu yfir á ný. Skoraði hann beint úr aukaspyrnu fyrir framan vítateig Chelsea meðan Cech markvörður var enn að stilla upp varnarveggnum. Urðu hinir bláklæddu æfir en dómaranum varð ekki haggað og markið stóð. Það tók Eið Guðjónssen aðeins tólf sekúndur að skora annað jöfnunarmark Chelsea strax í upphafi seinni hálfleiks. Aftur kom markið eftir fast leikatriði. Lampard tók aukaspyrnu fyrir sem Gallas skallaði svo fyrir markið þar sem Eiður beið færis og jafnaði. Leikurinn jafnaðist aðeins eftir mark Eiðs og fór að bera meira á tæklingum og harðari leik en lið Chelsea var þó meira með boltann og sköpuðu sér hættulegri færi en þó ekkert sem olli Almunia markverði Arsenal vandræðum. Í lok leiksins blésu leikmenn Arsenal til sóknar en vörn Chelsea stóðst pressuna. Stórmeistarajafntefli var niðurstaðan.