Dekkin mikilvægt öryggisatriði

"Góðir hjólbarðar eru gríðarlega mikilvægt öryggistæki," segir Jóhann Kristinsson hjá Ísdekkjum, "og skiptir miklu máli að fólk sé meðvitað um það. Hjólbarðinn má ekki vera veikasti hlekkurinn í öryggiskeðjunni." Jóhann segir að til sé viðmiðun um hvenær hjólbarði sé ónýtur. "Ef minna en 1,6 millimetrar eru eftir af mynstrinu er bíllinn orðinn ólöglegur," segir hann. "Það er líka mikilvægt á Íslandi að menn séu með vetrar- og sumardekk og geri ráð fyrir nöglum þegar það á við. Nú eru framleidd dekk með léttari nöglum sem gera sama gagn en fara betur með malbikið og þar að auki er miklu minna veghljóð í þeim. Hin svokölluðu heilsársdekk henta ekki endilega vel íslenskum aðstæðum, því þó að þau séu fín á malbikinu í bænum er ekki endilega víst að þau séu nóg góð þegar fólk þarf að renna í fermingarveislu austur fyrir fjall. Vetrardekkin eru framleidd úr mýkra gúmmíi en sumardekkin, sem þýðir að þau harðna ekki í frosti." Jóhann segir líka mikilvægt að þrífa hjólbarða vel ef götur hafa verið saltaðar. "Þá losnar tjara úr malbikinu og sest utan á hjólbarðana. Við þetta tapar hjólbarðinn veggripi. Þá er hægt að þvo dekkin upp úr leysiefni, en mjög mikilvægt er að skola dekkin á eftir úr volgu vatni því annars situr leysiefnið eftir í mynstrinu. Aðalatriði er svo að fólk sé meðvitað um mikilvægi góðra hjólbarða og leiti upplýsinga um hvað hentar hverju sinni."