Kennarar vilja gerðardóm

Kennarar vilja vísa launadeilunni til kjaranefndar eða í gerðardóm. Ekkert verður fundað í kennaradeilunni næstu tvær vikur. Ásmundur Stefánsson ríkissáttasemjari hefur ekki svarað skilaboðum frá því að þessar fregnir bárust skömmu eftir hádegi. Fundi sem hófst í húsakynnum ríkissáttasemjara klukkan tíu var slitið eftir hádegið. Kennarar segja tillögu sem sveitarfélögin lögðu fram í fyrradag of óljósa til að hægt sé að ræða hana og fulltrúar sveitarfélaganna höfnuðu tilboði kennara sem þeir lögðu fram á sama tíma. Það tilboð gerði ráð fyrir 25% launahækkunum, sem, ásamt fleiru, þýðir um 36% kostnaðaraukningu fyrir sveitarfélögin. Eiríkur Jónsson, formaður Kennarasambandsins, segir að kennarar hafi í kjölfarið lagt fram tillögu um að leita til þriðja aðila, til dæmis kjaranefndar eða gerðadóms. Eftir það hafi sameiginlega verði tekin ákvörðun um að fresta viðræðum í tvær vikur. Ásmundur Stefánsson ríkissáttasemjari hefur ekki svarað skilaboðum frá því að þessar fregnir bárust skömmu eftir hádegi. Þegar ljóst var í fyrradag að miðlunartillaga ríkissáttasemjara var kolfelld komu bæði sveitarfélögin og grunnskólakennarar með tillögur. Í tillögu sveitarfélaganna kemur að sögn fram vilji til að samræma vinnutíma og laun kennara við aðra háskólamenntaða starfsmenn. Þetta fengust kennarar ekki til að ræða, sögðu þetta eingöngu óljósar hugmyndir. Í tilboði kennaranna sjálfra felast talsvert meiri launahækkanir en í miðlunartillögu ríkissáttasemjara. Miðlunartillagan fól í sér 130 þúsund króna eingreiðslu, 16,5% launahækkun og 26% kostnaðarauka fyrir sveitarfélögin. Í tilboði kennara eru ákvæði um vinnufyrirkomulag sem eru svipuð og í miðlunartillögunni, en eingreiðslan 150 þúsund krónur, launahækkanir 25%, sem - ásamt fleiru - þýðir um 36% kostnaðaraukningu fyrir sveitarfélögin. Eiríkur Jónsson, formaður Kennarasambandsins, sagðist í hádegisfréttum Bylgjunnar telja að það sem kennarar „spili út“ þarna sé það sem þurfi til að leysa þetta verkfall. „Ég held að sveitarfélögin verði að kyngja þessu ef þau ætla að fá kennara inn í skólana,“ segir Eiríkur.