Í nám á fimmtugsaldri

Þuríður Sigurðardóttir er flestum kunn sem söngkona, en í símaskránni er hún titluð myndlistarkona. Ástæðan er að hún dreif sig í myndlistarnám á fimmtugsaldri og útskrifaðist með BA-gráðu frá Listaháskóla Reykjavíkur árið 2001. Þuríði hafði alltaf langað að læra myndlist en aðstæður höguðu því þannig að hún lagði drauminn á hilluna og reiknaði eiginlega ekki með að hann rættist. "Ég var mikið að teikna og mála sem barn og var dugleg að sækja myndlistarsýningar á boðsmiðunum hans pabba," segir hún hlæjandi. "Það var svo ekki fyrr en ég var orðin harðfullorðin að ég tók stúdentspróf og sótti svo um í Myndlistar- og handíðaskólann. Þar var mér hafnað í fyrstu atrennu. Það var svo fyrir hvatningu kennarans míns í FB að ég hringdi til að fá skýringar. Þá var mér sagt að mappan mín væri glæsileg, sem var gott fyrir egóið. Mér var jafnframt sagt að þegar tveir umsækjendur væru metnir að jöfnu færi sá inn sem væri yngri. Þá hrundi heimurinn," segir Þuríður, sem hélt að þar með væri hún úr leik. Henni var líka sagt að hún væri fyrst á biðlista en trúði því svona rétt mátulega. Hið stórkostlega gerðist samt, einn umsækjenda datt út og Þuríður komst inn. "Mér leið ekki eins og aldursforseta þó að ég væri vissulega eldri en samnemendurnir. Flestir gátu verið börnin mín, en þeir höfðu lag á að láta mig ekki finna fyrir því. Við erum meira að segja nokkur að vinna saman enn. Svo getur maður alveg lært þótt maður sé af barnsaldri." Þuríður er ekki hætt að syngja, en ákvað að helga sig náminu meðan á því stóð. "Ég mæli eindregið með því að fólk láti svona drauma rætast, það er svo endurnýjandi og hollt að vera með ungu fólki og fara inn á brautir sem maður þekkir ekki. Ég er afskaplega þakklát fyrir þetta nám og að hafa fengið að upplifa breytingarnar á þessum tíma þegar Myndlista- og handíðaskólinn breyttist í að vera Listaháskóli Íslands með nýjum áherslum og ferskum vindum. Og ef breytingaskeið getur verið jákvætt þá var þetta jákvætt breytingaskeið í orðsins fyllstu merkingu," segir Þuríður og hlær dátt.