Föndurstofan með námskeið

Þegar kvöldin lengjast kviknar áhuginn á ýmisskonar föndri. Því hefur Geirþrúður Þorbjörnsdóttir í Föndurstofunni Hátúni 6 komið á fót námskeiðum þar sem hún kennir gerð ýmisskonar muna, mynda og korta. Geisladiskamyndir eru heitasta nýjungin og það sem einna mestra vinsælda nýtur nú. Þá eru mynstur sem Geirþrúður hefur gatað á diskana saumað út og síðan er möguleiki að skreyta þá enn frekar, til dæmis með þrívíddarmyndum. Aðrar námsgreinar hjá henni eru þrívíddarmyndir og kort og þar er úr 400 mynstrum að velja. Auk þess er kenndur perlusaumur, annars vegar eins og sá sem notaður er í þjóðbúninga Grænlendinga og einnig er saumað úr japönskum smáperlum utanum kúlur svo úr verður himneskt skraut. Efnið sem notað er við þessa iðju er allt til á staðnum enda er Geirþrúður líka með föndurefnissölu á netinu og afgreiðir pantanir um allt land. Geirþrúður ólst upp á Seyðisfirði og kveðst hafa haft áhuga á handavinnu frá því hún man eftir sér. Hún bjó um árabil í Bandaríkjunum og kynntist þar mörgu af því sem nú þykir eftirsóknarverðast í hannyrðum og föndri. Ákvað að gefa öðrum hlutdeild í því og hefur rekið Föndurstofuna í rúmt ár. Námskeiðin eru á kvöldin og upplýsingar um þau eru veitt á vefnum www.föndurstofan.net og í síma 690 6745.