Styrkist á heimsvísu

Chevrolet ætlar að styrkja stöðu sína á heimsvísu með kynningu og markaðssetningu á nýrri línu af litlum og meðalstórum bílum í Evrópu frá og með janúar 2005. Til að byrja með verða bílarnir þróaðir og framleiddir fyrir Evrópumarkað af GM Daewoo í Suður-Kóreu en til stendur að fleiri framleiðslustaðir víðs vegar úr heiminum taki þátt. Þetta endurspeglar þá stefnu GM að auka vægi Chevrolet og styrkja stöðu merkisins á heimsvísu sem leiðandi merkis innan GM-samsteypunnar. Chevrolet-bílar samsettir af GM Daewoo hafa þegar verið í sölu á nokkrum stöðum í Mið- og Austur-Evrópu, í Norður- og Suður-Ameríku, á nokkrum stöðum í Asíu og Suður-Afríku og hefur sala á þessum bílum farið fram úr björtustu vonum. Aukin fjárfesting GM í verksmiðjum GM Daewoo í Suður-Kóreu upp á 1,5 milljarða Bandaríkjadala endurspeglar það traust sem GM ber til GM Daewoo. Á bílasýningunni í París mun S3X-hugmyndabíllinn gefa nokkra hugmynd um hvernig Chevrolet-bílar framtíðarinnar munu hugsanlega líta út. Hin nýja Evrópudeild Chevrolet mun nýta núverandi sölu- og þjónustukerfi GM Daewoo og verður hún ábyrg fyrir kynningu og sölu á Chevrolet-bílum.Chevrolet mun bjóða viðskiptavinum sínum net söluaðila sem telur yfir 1.800 fyrirtæki. Núverandi Daewoo-eigendur munu áfram njóta þjónustu og framleiðsluábyrgðar sem þessir aðilar veita. Bílar þeirra verða þjónustaðir af sömu aðilum og munu selja nýju Chevrolet-línuna.