Guðrún Björg er að byrja í MH

"Það er gaman að vera í nýjum skóla og með nýjar skruddur," segir Guðrún Björg Ingimundardóttir sem var að hefja nám við Menntaskólann í Hamrahlíð. Henni líst vel á umhverfið og andann í skólanum. En af hverju valdi hún MH? "Vegna viðhorfs skólans til lista. Ég hef verið í tónlistarnámi frá átta ára aldri og í MH er tónlistarkjörsvið sem ég nýti mér," segir hún og upplýsir að hún sé bæði að læra á píanó og túbu. Í framhaldinu er hún spurð hvort hún ætli í kórinn en því neitar hún og hefur meiri áhuga á leikstarfsemi skólans. "Ég hef tvisvar verið með atriði á Skrekki og svo var ég í hljómsveitinni í sýningu Hafnarfjarðarleikhússins á Meistaranum og Margarítu þannig að ég hef aðeins prófað að stíga á svið og langar að gera meira að því." Eftirlætisgreinar Guðrúnar í skólanum eru enska og saga og "allt sem tengist menningu og umheiminum," eins og hún orðar það sjálf. Enda þótt lesaðstaða sé í boði á bókasafni MH býst hún ekki við að nota hana mikið. "Mér finnst best að læra heima með eitthvað gott á fóninum," segir hún að lokum.