Fjölgun erlendra lækna í Danmörku

Fjöldi erlendra lækna sem starfa í Danmörku hefur þrefaldast á síðustu árum. Vegna mikils skorts á heilbrigðisstarfsfólki í landinu ráðgera stjórnvöld nú að flytja inn starfsfólk frá Austur- Evrópu. Skortur á læknum hefur ríkt í Danmörku undanfarin ár, sem og öðru heilbrigðisstarfsfólki. Ríkisstjórnin hefur svarað þessu m.a. með því að minnka kröfur í tungumálaprófum sem læknarnir verða að gangast undir til að þeir geti fengið starfsleyfi sín viðurkennd í Danmörku. Samkvæmt fréttum dagblaðsins Information fengu í fyrra 750 erlendir læknar starfsleyfi í Danmörku en fyrir fimm árum voru þeir rúmlega 200. Einnig er mikill skortur á hjúkrunarfólki og sjúkraliðum í Danmörku og eru uppi ráðagerðir um að flytja inn heilbrigðisstarfsfólk frá Austur-Evrópu. Ekki eru þó allir á eitt sáttir um þetta. Birthe Skaarup, einn þingmanna Danska þjóðarflokksins, telur sig þekkja dæmi þess að erlendir læknar hafi hreinlega ekki skilið sjúklinga sína og samtöl milli lækna og sjúklinga hafi gengið mjög erfiðlega. Því verði að stíga mjög varlega til jarðar og setja ströng skilyrði. Félag danskra lækna fagnar hins vegar þessum aðgerðum stjórnvalda. Carsten Rygaard, einn talsmanna félagsins, bendir annars vegar á læknaskortinn og hins vegar að Danmörk sé á frjálsu vinnumarkaðssvæði og því sé sjálfsagt að erlendir læknar geti sótt um og fengið vinnu í Danmörku.