Ummæli forsætisráðherra á CNN

Ummæli Davíðs Oddssonar í Hvíta húsinu í gær um að framtíð allrar heimsbyggðarinnar væri bjartari vegna aðgerðanna í Írak hafa vakið athygli heimspressunnar. Þingmaður Vinstri-grænna efast þó um að forsætisráðherra hafi þar á réttu að standa. Helstu fregnir íslenskra fjölmiðla af fundi þeirra Davíðs Oddssonar forsætisráðherra og George Bush Bandaríkjaforseta hafa snúist um framtíð varnarsamstarfs þjóðanna. Heimspressan virðist lítinn áhuga hafa á rekstri varnarstöðvarinnar í Keflavík eða stöðu atvinnumála á Suðurnesjum. Ummæli Davíðs um stríðið í Írak vöktu hins vegar athygli og meðal þeirra sem báru ummæli hans um heimsbyggðina var fréttastöðin CNN. Þar tók hann undir með Bush sem lagði áherslu á að umbreyting hefði orðið í Írak eftir innrás herliðs bandamanna. Davíð sagðist sammála Bush um Írak og að framtíð heimsins alls væri bjartari vegna aðgerðanna í landinu. Ástandið væri mun verra nú hefði ekki verið gripið til aðgerða; nú væri von þar sem enga von var áður að finna. Bush Bandaríkjaforseti þakkaði fyrir en aðrir undrast þessi orð forsætisráðherra Íslands. Kolbrún Halldórsdóttir, þingmaður Vinstri-grænna, segir að sennilega hafi á annan tug þúsunda óbreyttra borgara fallið í Íraksstríðinu, fyrir utan alla þá særðu. Hún segir það ekki taka nokkru tali að halda því fram að innrásin hafi gert heiminn betri en hann var fyrir aðgerðina. Kolbrún vísar í erlenda fjölmiðla sem halda því fram að hryðjuverkaógnin í veröldinni hafi vaxið eftir innrásina í Írak, þrátt fyrir það sem Bandaríkjaforseti hefur kallað stríð á hendur hryðjuverkum. Hún segir ekki óeðlilegt að fólk hafi áhyggjur af því að ummæli forsætisráðherra beini athygli hryðjuverkamanna að Íslandi þegar jafn stór sjónvarpsstöð og CNN sjónvarpi þessu um allan heim.