Viðræður um kjarnorkumál N-Kóreu

George Bush forseti Bandaríkjanna hyggst bjóða Norður-Kóreumönnum aðstoð af einhverju tagi gegn ýmsum ströngum skilyrðum, þar á meðal að hætta kjarnorkuvopnaáætlun sinni. Viðræður um kjarnorkumál Norður-Kóreu hefjast í Peking í dag og munu Rússar, Kínverjar, Japanar og Suður-Kóreumenn einnig taka þátt í þeim og bjóða Norður-Kóreumönnum að senda þeim olíu mánaðarlega. Að auki munu Bandaríkjamenn lofa því að ráðast ekki, að svo komnu í það minnsta, inn í Norður-Kóreu til að steypa þar stjórn einræðisherrans Kims Jong-il af stóli. Þrátt fyrir að menn séu óvenju vongóðir er hermt að hvorki Bandaríkjamönnum né stjórnvöldum Norður-Kóreu sé sérstaklega umhugað að ljúka viðræðum fyrir forsetakosningarnar í Bandaríkjunum.