Þjóðhátíðardagur í Stafangri

Það er vel hægt að halda þjóðhátíðardaginn hátíðlegan þótt út fyrir landsteina sé farið. Í Stafangri í Noregi búa í kringum 400 Íslendingar og í Íslendingafélaginu þar eru 130 manns. Félagar Íslendingafélagsins fylktu liði og gengu með íslenska fánann um götur bæjarins á 17. júní. Sjá mátti íslenska þjóðbúninginn og þjóðsöngurinn ómaði úr lúðrum sveitar sem lék íslensk lög í tilefni dagsins. Yngri kynslóðin stundaði síðan íslenska leiki af kappi og sjá mátti sannan víkingaeldmóð í boðhlaupi, pokahlaupi og reipitogi.