Gítarar Claptons á uppboði

Eric Clapton hefur ákveðið að selja 58 gítara á uppboði til styrktar meðferðarheimili fyrir áfengis- og fíkniefnasjúklinga sem hann hann stofnaði í Vestur-Indíum. Verðmætasti gítarinn er talinn Fender Stratocaster, sem gengur undir nafninu Blackie, en Clapton notaði varla annan gítar á tímabilinu frá 1970 til 1985. Clapton lék meðal annars á þennan gítar í lögunum „Wonderful Tonight“ og „Cocaine“ og þykir síðarnefnda lagið vel við hæfi miðað við tilefni uppboðsins. Fyrir fimm árum voru 100 gítarar Claptons seldir á uppboði fyrir meira en 5 milljónir dollara, eða yfir 360 milljónir króna. Annar Fender Stratocaster, sem Clapton kallaði Brownie og var meðal annars notaður í laginu „Layla“, seldist þá á hálfa milljón dollara, eða 36 milljónir króna.