Bullur valda óeirðum

Óeirðir brutust út, aðra nóttina í röð, á Albúfeira-ströndinni í Portúgal, þar sem breskar fótboltabullur halda til. Fjöldi Íslendinga nýtur sólarinnar á sömu slóðum, og ráðleggja fararstjórar þeim að halda sig fjarri þeim stöðum sem Bretarnir eru með læti. Skömmu eftir að leik Englands og Þýskalands lauk með jafntefli í gær mættu hundruð fótboltaáhugamanna í megin skemmtistaðagötuna á Albúfeira til að fagna. Þeir sungu fótboltasöngva og stöðvuðu umferð. Innan skamms æstust leikar, ölvunin jókst og kalla varð á lögreglu til að skakka leikinn. 34 voru handteknir eftir að bullurnar tóku að kasta flöskum og plaststólum á lögreglumenn sem fylgdust með og gættu öryggis. Á milli þrjú- og fjögurhundruð manns tóku þátt í ólátunum. Tveir Bretar og einn lögreglumaður slösuðust lítillega. Helgi B. Sigurðsson, fararstjóri á Albúfeira, segir fjölda íslenska ferðamanna hafa orðið vara við ólætin í gær og fyrrinótt. Helgi segir einhverja Íslendinga hafa orðið vara við ólætin sem verða yfirleitt á götu sem Íslendingar kalla Laugarveginn. Yfirleitt verði lætin eftir miðnætti. Helgi segir fararstjóra hafa gefið ferðamönnum skýrar leiðbeiningar. Þeir ráðleggi þeim að vera ekki á Laugarveginum eftir miðnætti, og forða sér ef þeir verða varir við ólæti.   Breskir fótboltaáhugamenn hafa löngum verið barnanna verstir, þegar að skrílslátum kemur, og hefur alþjóða knattspyrnusambandið varað breska landsliðið við, og hótað því að liðið geti verið bannað frá alþjóðakeppni valdi áhangendur þess vandræðum. Talsmenn breska knattspyrnusambandsins segja að bullurnar hafi ekkert með knattspyrnu að gera, heldur séu þetta einfaldlega ungir og villtir karlar í fríi  á stað þar sem áfengið sé ódýrt. Það höndli þeir ekki og verði sér til skammar með þessum afleiðingum.