INXS tekur þátt í Rock Star

Ástralska rokksveitin INXS, sem missti söngvara sinn, Michael Hutcence eftir sjálfvíg hans árið 1997, ætlar að taka þátt í raunveruleikaþættinum Rock Star. Sveitin er m.a. þekkt fyrir lögin Need You Tonight og Devil Inside. Í þættinum, sem er gerður af Mark Burnett, höfundi Survivor og The Apprentice, keppir fólk um tækifæri til að láta draum sinn rætast og gerast rokkstjarna. Sigurvegarinn mun syngja inn á fyrstu plötu INXS í sjö ár, eða síðan hún gaf út Elegantly Wasted 1997, og fara með henni í tónleikaferð um heiminn. "Ég hef verið aðdáandi INXS í langan tíma og það er frábært að hljómsveitin hafi komið til okkar með þessa hugmynd og treyst okkur fyrir framtíð sinni," sagði Burnett. "Að mínu mati er pláss í sjónvarpinu fyrir meira en einn hæfileikaþátt í tónlist og rokkið hefur algjörlega orðið útundan til þessa." Síðan Hutchence lét lífið hefur eftirlifandi meðlimum INXS gengið erfiðlega að finna staðgengil hans. Samlandi þeirra, Jon Stevens, hefur mest sungið með þeim en sveitin vill annan söngvara. "Síðan Michael dó vildum við leita út um allan heim að nýjum söngvara en vissum ekki hvernig við ættum að gera það," sagði Tim Farris, meðlimur sveitarinnar. "Með því að fá Mark og félaga til að taka verkefnið að sér höfum við fundið frábæra leið til að láta það gerast." Áhorfendur þáttarins geta ekki valið upp á sitt einsdæmi rokkstjörnuna sem vinnur, ólíkt því sem verið hefur í þáttum á borð við Idol. Hljómsveitarmeðlimirnir og sérfræðingar úr tónlistarbransanum munu einnig hafa sitt að segja.