Plata og barnabók frá Carey

Söngkonan Mariah Carey er að vinna að nýrri plötu. Verður það önnur platan sem hún gefur út hjá fyrirtækinu Island Def Jam. Fyrsta plata, Charmbracelet, hefur selst í 1,1 milljón eintaka í Bandaríkjunum og vonast söngkonan til að gera enn betur með þeirri næstu. Carey hefur mörg járn í eldinum um þessar mundir því hún ætlar á næstunni að gefa út barnabók um munaðarlausa stúlku auk þess sem hún hyggur á frekari landvinninga í Hollywood. Þótti hún standa sig vel í síðustu mynd sinni, Wisegirls, og íhugar nú að fylgja þeirri velgengni eftir.