Vegleg 17. júní hátíð í ár

Hátíðardagskráin sautjánda júní verður með veglegra móti í Reykjavík í ár þar sem Íslendingar fagna sextíu ára afmæli lýðveldisins. Að sögn Benónýs Ægissonar, verkefnisstjóra hátíðarhaldanna í Reykjavík, verður bætt við fleiri sviðum og skemmtiatriðum og verður miðbærinn skreyttur sem aldrei fyrr. Athöfnin á Austurvelli verður þó með hefðbundnu sniði. Ekki stendur til að breyta þeirri hefð sem komin er á hátíðardagskrána á Austurvelli og mun hún hefjast klukkan tuttugu mínútur í ellefu, með ávarpi Önnu Kristinsdóttur, formanns Þjóðhátíðarnefndar. Að því loknu munu forseti lýðveldisins, Ólafur Ragnar Grímsson, og forsætisráðherra, Davíð Oddsson, ganga á völlinn eins og vant er og mun forsetinn leggja blómsveig frá þjóðinni að minnisvarða Jón Sigurðssonar. Að þjóðsöngnum loknum flytur forsætisráðherra ávarp sitt sem verður að öllum líkindum hans síðasta þjóðhátíðarávarp þar sem hann lætur af embætti í haust. Við athöfnina verður nýtt ræðupúlt vígt þar sem hið gamla var farið að láta á sjá eftir sextíu ára notkun. Í tilefni lýðveldisafmælisins mun biskup Íslands, Karl Sigurbjörnsson, predika í Dómkirkjunni klukkan tuttugu mínútur yfir ellefu. Skemmtiatriðum verður einnig fjölgað í tilefni afmælisins og verða svið í Hljómskálagarðinum og Hallargarðinum auk þeirra sem vanalega standa á Ingólfstorgi og við Arnarhól. Einnig munu börnin væntanlega setja svip sinn á daginn þar sem fánaveifum hefur verið dreift til allra leikskólabarna í Reykjavík í tilefni af lýðveldisafmælinu.