Stöðvaðir á flugvellinum 11. sept.

Fjórir af flugræningjunum sem tóku þátt í hryðjuverkaárásinni á Bandaríkin 11. september 2001 voru stöðvaðir við öryggishlið á flugvelli í Washingtonborg fyrr um morguninn hinn örlagaríka dag. Á myndbandi úr eftirlitsmyndavélum sést hvar mennirnir eru skoðaðir nánar eftir að málmleitartæki hafði gefið frá sér viðvörunarhljóð. Mennirnir fóru svo um borð í flug 77 en þeirri vél var flogið á Pentagon í árásunum. Myndbandið er gert opinbert einum degi áður en kynnt verður skýrsla um aðdraganda árásanna og viðbrögð bandarískra stjórnvalda. Samkvæmt heimildum AP-fréttastofunnar kemur fram í skýrslunni að hryðjuverkamennirnir hafi nýtt sér alvarlega galla á bandarísku stjórnkerfi. Hins vegar er skuldinni hvorki skellt á George W. Bush Bandaríkjaforseta né Bill Clinton, fyrrverandi forseta. Hægt er að horfa á hluta myndbandsins úr morgunsjónvarpi Stöðvar 2 með því að smella á hlekkinn sem fylgir fréttinni.