Pentagon neitar pyntingum á Saddam

Yfirmenn í Pentagon vísa á bug ásökunum lögfræðings Saddams Hússeins, þess efnis að forsetinn fyrrverandi hafi mátt þola mannréttindabrot í fangavist sinni. Lögfræðingurinn hefur haldið því fram að á Saddam séu nýleg sár og að hann hafi mátt þola pyntingar í líkingu við þær sem átt hafi sér stað í Abu Ghraib fangelsinu. Þessu neita ráðamenn í Pentagon og segja að meðferðin á Saddam falli í einu og öllu að ákvæðum Genfarsáttmálans. Auk þess hafi alþjóðleg nefnd Rauða krossins heimsótt Saddam þrisvar sinnum í prísundina, án þess að finna neitt athugavert við meðferðina á honum.