Stíla inn á húmor í þáttunum

"Þetta er svolítið öðruvísi sumarvinna en að liggja í beði og reyta arfa," segir Karl Sigurðsson en hann er einn af fjórum fræknum krökkum sem sjá um útvarpsþáttinn Ungmennafélagið á Rás 2. "Þetta er þáttur fyrir ungt fólk og við umsjónarmennirnir erum öll fimmtán ára. Við verðum í samstarfi við UMFÍ í sumar og erum á sömu launum og vinnuskólinn býður upp á," segir Karl en auk hans hafa þau Bryndís Erla Sigurðardóttir, Vilborg Pétursdóttir og Guðfinnur Sveinsson umsjón með þættinum. "Við viljum hafa þáttinn fjölbreyttan og í sumar ætlum við að vera dugleg við að fara út úr stúdíóinu og ræða við unglinga sem eru að gera skemmtilega hluti. Við stílum svolítið inn á að hafa húmor í þáttunum og erum með Dallinn þar sem nokkrir krakkar sjá um að búa til stuttar grínsenur. Tónlistin skiptir okkur líka miklu máli. Margir halda að unglingar hlusti bara á Britney Spears eða svona fm tónlist en við spilum líka rokktónlist með böndum eins og Metallicu og íslenska hallæristónlist í bland við það heitasta." Þátturinn er í loftinu fjögur kvöld vikunnar frá mánudögum til fimmtudags frá átta til tíu. "Við erum með nokkra fasta dálka og hópur ungra læknanema heimsækir okkur á mánudögum til að fræða okkur um kynlíf og ýmiss konar forvarnir. Við fáum líka heilsupistla frá Gaua litla og fræðslu frá Regnbogasamtökunum en á fimmtudögum eru þættirnir tileinkaðir landsbyggðinni." Ragnar Páll Ólafsson er dagskrárgerðarmaður þáttarins."Raggi Palli er reyndur útvarpsmaður og hann hefur sýnt okkur hvernig hlutirnir virka," segir Karl, "og það er svaka flott að hafa heila tvo tíma í útvarpinu þar sem unglingar geta miðlað til unglinga."