Tæplega hundrað konur á Íslandi skráðar á vefsíðu fyrir fylgdarþjónustu

Tæplega hundrað konur sem segjast vera staðsettar á Íslandi eru skráðar á alþjóðlega vefsíðu fyrir fylgdarþjónustu. Á síðunni kemur fram að auðvelt sé að verða sér úti um fylgdarkonu í Reykjavík. Lögregla fær reglulega ábendingar um slikar síður, en rannsóknir á þeim skila venjulega ekki árangri.

Hátt í þrjátíu þúsund konur eru skráðar á vefsíðuna cityoflove.com, en í lýsingu síðunnar segir að hún sé ætluð viðskiptamönnum sem ferðast mikið og eru að leita sér að fylgdarþjónustu. Síðan hefur verið starfrækt í tíu ár en á hana eru skráðar hátt í þrjátíu þúsund konur frá 92 löndum, þar á meðal Svíþjóð, Noregi og Íslandi.

86 konur segjast vera staðsettar í Reykjavík og 9 í Hafnarfirði en þær hafa ýmist verið skráðar á síðuna í lengri eða skemmri tíma, einhverjar í um eitt ár.

Á vefsíðunni kemur fram að í Reykjavík sé auðvelt að verða sér úti um fylgdarþjónustu á hvaða tíma sólarhrings sem er. Fylgdarkonur sé meðal annars að finna á skemmtistöðum í miðbænum.

Síðan gefur sig út fyrir að vera ætluð fyrir fylgdarþjónustu, eða svokallað escort, en þegar nánar er skoðað er augljóst að hún er hugsuð fyrir vændi. Flestar kvennanna sem skráðar eru á Íslandi gefa þannig upp tímaverð í íslenskum krónum. Hálftíma, klukkutíma og þar fram eftir götum. Þá koma fram á síðunni ýmsar persónuupplýsingar, hæð kvennanna, þyngd þeirra, hárlitur og íslensk símanúmer.

Fréttastofa hringdi í nokkur númeranna sem gefin eru upp á síðunni og voru þau flest virk.

Árni Þór Sigmundsson, yfirmaður kynferðisbrotadeildar lögreglunnar, kannaðist ekki við umrædda vefsíðu þegar fréttastofa hafði samband við hann í dag. Lögreglu berast þó reglulega ábendingar um síður af þessu tagi og er reynt að fylgja því eftir eins og hægt er. Árni segir þó að slík mál séu erfið viðureignar og skila rannsóknir á þeim því venulega ekki miklu, meðal annars vegna þess að í þeim tilvikum sem konurnar hafa verið með íslensk símanúmer hafa þær verið með frelsiskort sem ekki er hægt að rekja. Þá séu konurnar oft aðeins staddar tímabundið hér á landi.