Búið að birta forstjóra Silicor stefnuna

Bjarki Ármannsson skrifar 26. október 2015 21:58

Loftmynd af Grundartanga þar sem væntanlegt athafnasvæði Silicor er afmarkað.

Hópur fólks hefur birt Theresa Jester, forstjóra og stjórnarformanni bandaríska fyrirtækisins Silicor Materials, stefnu þar sem þess er krafist að bygging fyrirhugaðs kísilvers á Grundartanga sæti umhverfismati. Lögmaður hópsins segir að málið verði þingfest í Héraðsdómi Reykjavíkur í desember.

Þetta kemur fram í frétt á vef Ríkisútvarpsins. Í hópnum eru meðal annars fulltrúar Kjósahrepps, bændur á svæðinu og starfsfólk í ferðaþjónustu. Þau krefjast þess að ákvörðun Skipulagsstofnunar um að kísilverksmiðjan þurfi ekki að sæta mati á umhverfisáhrifum verði ógilt.

Vísir greindi frá stefnunni í ágúst síðastliðnum en þá kom fram að enginn vildi taka við stefnunni hér á landi fyrir hönd fyrirtækisins. Það hefur þó tekist að birta Jester stefnuna á heimili hennar í Bandaríkjunum, að því er segir í frétt RÚV.

Silicor Materials áætlar að framleiða 16.000 tonn af sólarkísil í 92.000 fermetra verksmiðju í Hvalfjarðarsveit. Nokkur styr hefur staðið um verksmiðjuna en Skipulagsstofnun úrskurðaði fyrir rúmu ári síðan að verksmiðjan þyrfti ekki að fara í umhverfismat. Var það mat stofnunarinnar að starfsemi verksmiðjunnar væri ekki líkleg til að hafa í för með sér umtalsverð umhverfisáhrif.

Tengdar fréttir

Trúa ekki lengur loforðum um mengunarlausa stóriðju

Umhverfisvaktin við Hvalfjörð segir fátt nýtt í svörum Faxaflóahafna vegna sólarkísilverksmiðju. Ef verksmiðjan mengi eins lítið og lofað sé þá ætti hún að rísa á hafnarbakkanum í Reykjavík þar sem vinnuaflið sé fyrir.

22. maí 2015 07:00

Áhrif framleiðslunnar á umhverfið óveruleg

Bent hefur verið á að veruleg mengun hafi fylgt framleiðslu sólarkísils. Í grein sem Haraldur Sigurðsson eldfjallafræðingur ritar á vef sinn bendir hann á að slíkri framleiðslu hafi fylgt mikil losun á eiturefninu sílikontetraklóríði auk þess sem klórgas berist í miklu magni út í andrúmsloftið.

25. júlí 2014 07:00

Misheppnuð ævintýri Silicor Materials

Stjórnvöld í Ohio og Mississippi hafa farið flatt á viðskiptum sínum við fyrirtækið sem hyggst reisa sólarkísilverksmiðju fyrir 77 milljarða króna á Grundartanga.

16. júlí 2014 15:15