Dirk Nowitzki fór hamförum

Dirk Nowitzki var gjörsamlega óstöðvandi í morgun þegar Þjóðverjar unnu 108-103 sigur á Angóla í rafmögnuðum þríframlengdum leik á HM í körfubolta sem fram fer í Japan. Nowitzki skoraði 47 stig og hirti 16 fráköst fyrir Þjóðverja, en þetta var í fyrsta sinn í sögu HM sem leikur fer í þrjár framlengingar.

Atvik í leik Manchester City og Portsmouth til rannsóknar

Enska knattspyrnusambandið og lögreglan í Manchester eru nú að rannsaka ljótt atvik sem átti sér stað í leik Manchester City og Portsmouth í ensku úrvalsdeildinni í gær, þegar Ben Thatcher, leikmaður City, rotaði Portúgalann Pedro Mendes hjá Portsmouth.

Hundóánægður með hugarfar leikmanna

Jose Mourinho, stjóri Chelsea, var skiljanlega ekki sáttur við sína menn eftir að þeir töpuðu 2-1 fyrir Middlesbrough í ensku úrvalsdeildinni í gær. Hann sagði liðið sem hann horfði á missa niður 1-0 forystu og tapa á síðustu tíu mínútum leiksins ekki hafa verið "Jose Mourinho lið."

Þrír leikir í kvöld

Fimmtánda umferð Landsbankadeildar karla hefst í kvöld með þremur leikjum. KR mætir ÍBV vestur í bæ, ÍA tekur á móti Keflavík og Grindavík og Víkingur mætast suður með sjó. Umferðinni lýkur síðan á sunnudag þegar FH tekur á móti Breiðablik og Valsmenn heimsækja Fylki í Árbæinn.

Vill burt frá Stoke City

Hannes Þ. Sigurðsson staðfesti við Fréttablaðið í gær að hann vilji fara frá Stoke City sem leikur í ensku 1. deildinni. Samkvæmt heimildum Fréttablaðsins hafa norsk lið mikinn áhuga á að klófesta kappann.

Valsmenn eru stórhuga fyrir komandi leiktíð

Valsmenn boðuðu til mjög svo veglegs blaðamannafundar í húsakynnum Frjálsa fjárfestingabankans í gær þar sem farið var yfir stöðu mála, bæði hjá meistaraflokki karla og kvenna. Markmið Vals er mjög einfalt, sigur í öllum keppnum sem í boði eru.

Arsenal í riðlakeppnina

Arsenal tryggði sér í kvöld sæti í riðlakeppni meistaradeildar Evrópu með því að leggja króatíska liðið Dynamo Zagreb 2-1 á heimavelli sínum. Arsenal vann fyrri leikinn 3-0 og er því komið áfram samanlagt 5-1. Gestirnir komust í 1-0 í kvöld og hleyptu smá lífi í einvígið, en mörk frá Freddy Ljungberg og Mathieu Flamini tryggðu Arsenal öruggan sigur.

Meistarabragur á Manchester United

Manchester United hélt uppteknum hætti í annari umferð ensku úrvalsdeildarinnar í kvöld þegar liðið burstaði Charlton 3-0 á útivelli. Hermann Hreiðarsson var í byrjunarliði Charlton, sem mátti sín lítils gegn sterku liði United. Darren Fletcher, Louis Saha og Ole Gunnar Solskjær skoruðu mörk United sem er í efsta sæti deildarinnar með fullt hús stiga.

Middlesbrough lagði Chelsea

Englandsmeistarar Chelsea töpuðu sínum fyrsta leik í ensku úrvalsdeildinni strax í annari umferð, en í kvöld lá liðið 2-1 fyrir Middlesbrough á útivelli. Andriy Shevchenko kom Chelsea yfir í upphafi leiks, en Emanuel Pogatetz jafnaði metin á 80. mínútu og Mark Viduka skoraði svo sigurmark Boro á lokamínútunni. Þetta er annað árið í röð sem Boro leggur Englandsmeistarana á heimavelli sínum.

Á batavegi eftir vel heppnaða aðgerð

Sir Bobby Robson er sagður á góðum batavegi eftir að hann gekkst undir skurðaðgerð í dag, þar sem lítið æxli var fjarlægt úr heila hans. Hinn 73 ára gamli Robson verður undir ströngu eftirliti á sjúkrahúsi næstu tvo daga og ef allt gengur að óskum ætti hann að geta snúið fljótlega aftur til starfa fyrir írska landsliðsiðið.

Roy Keane að taka við Sunderland?

Breskir fjölmiðlar greina frá því í kvöld að Roy Keane, fyrrum fyrirliði Manchester United og írska landsliðsins, verði ráðinn sem næsti knattspyrnustjóri 1.deildarliðs Sunderland. Því er haldið fram að Niall Quinn, stjórnarformaður Sunderland, sé þegar búinn að fá Keane til að samþykkja að taka við liðinu sem hefur gengið hörmulega í upphafi leiktíðar á Englandi og hefur tapað fjórum fyrstu leikjum sínum eftir fall úr úrvalsdeildinni í vor.

Gravesen fer frá Real

Umboðsmaður danska landsliðsmannsins Thomas Gravesen hjá Real Madrid er nú staddur á Bretlandseyjum þar sem hann segist vera í viðræðum við nokkur félög með það í huga að koma leikmanninum frá spænska félaginu. Real er sagt vilja um 2 milljónir punda fyrir miðjumanninn og hefur hann helst verið orðaður við Glasgow Celtic í Skotlandi.

Lítið skorað í fyrri hálfleik

Fá mörk litu dagsins ljós í fyrri hálfleik í viðureignum kvöldsins í ensku úrvalsdeildinni, en síðari hálfleikur er nú hafinn í leikjunum sex sem standa yfir. Andriy Shevchenko skoraði mark Chelsea sem hefur yfir 1-0 gegn Middlesbrough.

Arsenal undir í hálfleik

Arsenal er undir 1-0 gegn Dynamo Zagreb þegar flautað hefur verið til hálfleiks í viðureign liðanna í forkeppni meistaradeildar Evrópu. Arsenal vann fyrri leikinn 3-0 og er því enn í ágætum málum með að komast áfram í riðlakeppnina. Leikurinn er sýndur beint á Sýn.

Larsson sleppur með skrekkinn

Sænski framherjinn Henrik Larsson verður ekki ákærður fyrir líkamsárás eftir að sannað þótti að hann hefði kýlt andstæðing sinn í leik með Helsingborg um síðustu helgi. Saksóknari tilkynnti þetta í dag, en Larsson á hinsvegar enn yfir höfði sér leikbann að hálfu sænska knattspyrnusambandsins.

Stefán fór á kostum hjá Lyn

Stefán Gíslason var hetja Lyn í kvöld þegar liðið gerði 3-3 jafntefli við Lilleström á heimavelli sínum í norsku úrvalsdeildinni í knattspyrnu. Stefán skoraði tvö marka Lyn og það síðara var jöfnunarmark liðsins í uppbótartíma. Indriði Sigurðsson var einnig í liði Lyn, en leikmenn Lilleström voru manni færri allan síðari hálfleikinn og komust raunar í 3-1 í leiknum áður en Stefán tók til sinna ráða í lokin.

Íslendingarnir í eldlínunni

Sex leikir fara fram í ensku úrvalsdeildinni í knattspyrnu í kvöld og verða íslensku leikmennirnir þar allir í eldlínunni. Hermann Hreiðarsson verður í vörn Charlton sem fær það erfiða verkefni að mæta heitu liði Manchester United á heimavelli sínum, Heiðar Helguson er í leikmannahópi Fulham gegn Bolton og þeir Ívar Ingimarsson og Brynjar Björn Gunnarsson verða væntanlega í hóp Reading sem sækir Aston Villa heim.

Miðasala gengur mjög vel

Miðasala á leik Íslands og Danmerkur á Laugardalsvelli í undankeppni EM 2008 gengur mjög vel og nú eru aðeins nokkur hundruð miðar eftir á leikinn sem fram fer þann 6. september næstkomandi. Miðaverð í forsölu er á bilinu 1500 til 4500 krónur og hægt er að nálgast miða á vefsíðunni midi.is. og í verslunum Skífunnar og BT.

Beðið eftir niðurstöðu læknisskoðunar

Enn er óvíst hvort markahæsti leikmaður Landsbankadeildar karla í knattspyrnu, Marel Baldvinsson í Breiðablik, gangi í raðir norska liðsins Molde. Hann gekkst nú síðdegis undir læknisskoðun hjá norska félaginu. Í kjölfarið skrifaði hann svo undir tveggja og hálfsárs samning en er þessa stundina í flugvél á leið aftur heim til Íslands.

Ooijer til Blackburn

Hollenski miðvörðurinn Andre Ooijer hefur skrifað undir tveggja ára samning við enska úrvalsdeildarfélagið Blackburn, með möguleika á eins árs framlengingu. Ooijer er 32 ára gamall landsliðsmaður og kemur frá PSV Eindhoven. "Við erum búnir að leita að miðverði í allt sumar og loksins komnir með mann sem hefur spilað með liðum í fremstu röð og er hokinn af reynslu," sagði Mark Hughes knattspyrnustjóri Blackburn.

Arsenal - Dynamo Zagreb í beinni á Sýn í kvöld

Síðari leikur Arsenal og Dynamo Zagreb í forkeppni meistaradeildar Evrópu verður sýndur beint á Sýn í kvöld og hefst útsending klukkan 18:55. Arsenal vann fyrri leikinn 3-0 og er því í afar vænlegri stöðu fyrir heimaleikinn á Emirates-vellinum í kvöld, þar sem sæti í riðlakeppni meistaradeildarinnar er í húfi.

Pat Riley verður áfram með Miami

Hinn sigursæli þjálfari Pat Riley, sem þjálfaði Miami Heat og stýrði liðinu til NBA meistaratitilsins í vor, hefur tilkynnt að hann muni þjálfa liðið áfram á næstu leiktíð. Riley hefur legið undir feldi í allt sumar og í dag gaf Miami út yfirlýsingu þar sem fram kemur að Riley verði áfram þjálfari liðsins.

Federer gerir atlögu að þriðja titlinum í röð

Tenniskappinn Roger Federer mun halda áfram að skrá nafn sitt á spjöld sögunnar næstkomandi mánudag þegar hann mætir Kínverjanum Wang Yeu-Tzuoo í fyrstu umferð opna bandaríska meistaramótsins. Federer gerir þar atlögu að því að vinna titilinn þriðja árið í röð, en það hefur aðeins þeim John McEnroe og Ivan Lendl tekist á síðustu áratugum. Mótið hefst á mánudag og stendur yfir til 10. september.

Mourinho afar óhress með styrkleikaflokkana

Jose Mourinho, stjóri Englandsmeistara Chelsea, segist ekki skilja í því hvernig standi á því að Chelsea lendi í öðrum styrkleikaflokki þegar dregið verði í riðla í meistaradeild Evrópu á morgun, á meðan lið sem Chelsea hefur skotið aftur fyrir sig í deildinni heimafyrir síðustu tvö ár, eru í fyrsta styrkleikaflokki.

Sissoko verður frá í tvær vikur

Talsmenn enska úrvalsdeildarliðsins Liverpool hafa staðfest að miðjumaðurinn Mohamed Sissoko verði frá keppni í að minnsta kosti tvær vikur eftir að hann var borinn af velli meiddur á hné í Evrópuleiknum gegn Maccabi Haifa í gærkvöldi. Þá varð varnarmaðurinn Stephen Warnock einnig fyrir nokkrum meiðslum í gær, en búist er við því að hann nái sér fyrr en félagi hans.

Gatlin fær minnst fjögurra ára bann

Forráðamenn alþjóða frjálsíþróttasambandsins hafa gefið það út að bandaríski spretthlauparinn Justin Gatlin muni þurfa að sitja af sér lágmark fjögur ár af þeim átta sem honum voru dæmd í gærkvöld fyrir að falla á lyfjaprófi í annað sinn á ferlinum. Enn á eftir að koma betur í ljós af hverju of hátt magn testósteróns mældist í Gatlin, en þó svo gæti farið að bannið yrði stytt eitthvað, mun hann alltaf þurfa að taka út lágmark fjögurra ára bann að sögn talsmann frjálsíþróttasambandsins.

FIFA hótar að vísa Ítölum úr undankeppni EM

Alþjóða knattspyrnusambandið, FIFA, hefur hótað að vísa ítalska landsliðinu út úr undankeppni EM 2008 ef forráðamenn Juventus láti ekki af endalausum áfrýjunum sínum á dómnum í knattspyrnuhneykslinu á Ítalíu. Forráðamenn Juventus eru enn að mótmæla því að liðið skuli hafa verið fellt niður um deild og nú er FIFA nóg boðið.

Skorað fyrir gott málefni

Landsbanki Íslands, aðalstyrktaraðili efstu deildar karla- og kvenna í knattspyrnunni hér á landi, hefur í tilefni af 120 ára afmæli sínu ákveðið að hrinda af stað verkefni sem kallað hefur verið "Skorað fyrir gott málefni." Bankinn ætlar að gefa veglega fjárhæð til styrktar hjartveikum börnum fyrir hvert skorað mark í næstu umferð karla- og kvennadeildarinnar.

Domenech fundar með leikmönnum

Raymond Domenech hefur boðað þá Liliam Thuram og Claude Makele á fund sinn þar sem hann ætlar að reyna að sannfæra þá um að halda áfram að spila með franska landsliðinu í undankeppni EM 2008. Thuram er leikjahæsti franski landsliðsmaðurinn í HM hópnum í sumar og Makelele hefur enn ekki gefið upp hvort hann gefi áfram kost á sér í landsliðið. Thuram er 34 ára gamall og spilar með Barcelona, en Makelele er 33 ára og spilar með Chelsea.

Camara semur við Wigan

Framherjinn Henri Camara hefur skrifað undir nýjan þriggja ára samning við enska úrvalsdeildarfélagið Wigan og er því samningsbundinn félaginu til ársins 2009. Ákvæði í gamla samningnum hans gaf til kynna að hann ætti rétt á nýjum og bættum samningi ef liðið héldi sæti sínu í úrvalsdeildinni á síðustu leiktíð, en gamli samningurinn var til ársins 2008. Camara er frá Senegal og er 29 ára gamall. Hann skoraði 12 mörk í 30 leikjum fyrir Wigan á ótrúlegri fyrstu leiktíð félagsins í úrvalsdeildinni í fyrra.

Valsmenn ætla sér stóra hluti

Handknattleiksdeild Vals ætlar sér stóra hluti í karla- og kvennaflokki á næstu leiktíð og nú hefur félagið tilkynnt leikmannahópa sína í báðum flokkum fyrir veturinn. Landsliðsmaðurinn Markús Máni Michaelsson hefur sem kunnugt er ákveðið að snúa aftur á Hlíðarenda og þá hefur félagið gert samning við hinn efnilega Ernir Hrafn Arnarson.

Anthony setti met í sigri Bandaríkjamanna

Carmelo Anthony skoraði 35 stig þegar bandaríska landsliðið í körfubolta lagði sterkt lið Ítala 94-85 á HM í körfubolta í dag. Þetta var fjórði sigur Bandaríkjamanna í röð og tryggði sigurinn liðinu toppsætið í D-riðli. Enginn leikmaður hefur skorað jafn mörg stig og Anthony í landsleik fyrir Bandaríkin, en eldra metið átti Kenny Anderson þegar hann skoraði 34 stig fyrir landsliðið árið 1990.

Gefur út yfirlýsingu í dag

Enski landsliðsmaðurinn Owen Hargreaves mun í dag gefa út yfirlýsingu á blaðamannafundi hjá Bayern Munchen, þar sem allt eins er búist við því að hann fari fram á að verða seldur frá félaginu. Orðrómur er á kreiki um að leikmaðurinn hafi verið sektaður fyrir að halda því ítrekað fram í fjölmiðlum að hann vilji ganga í raðir Manchester United á Englandi, en hann er samningsbundinn þýska félaginu til ársins 2010.

Ég á nóg inni

Búlgarski framherjinn Dimitar Berbatov hjá Tottenham var ekki lengi að sýna hvað í honum bjó í gær þegar hann skoraði sitt fyrsta mark á White Hart Lane eftir aðeins sjö mínútur í leik gegn Sheffield United. Þessi mikli markahrókur segist eiga nóg inni.

Markus Merk snýr aftur

Þýski knattspyrnudómarinn Markus Merk hefur tilkynnt að hann ætli að halda áfram dómgæslu, en hann tók sér frí af persónulegum ástæðum eftir að hann náði sér alls ekki á strik við dómgæslu í riðlakeppninni á HM. Merk hefur almennt verið álitinn besti dómari Þjóðverja, en talið var að hann hefði íhugað að hætta alveg að dæma. Hann segir stuðning kollega sinna hafa orðið þess valdandi að hann ákvað að snúa aftur.

Ronaldo á leið til AC Milan?

Forráðamenn spænska félagsins Real Madrid munu í dag hitta kollega sína hjá AC Milan þar sem rætt verður um hugsanleg kaup ítalska félagsins á brasilíska framherjanum Ronaldo. AC Milan tryggði sér í gærkvöld sæti í riðlakeppni meistaradeildarinnar og eru forráðamenn félagsins nú að leitast við að styrkja leikmannahóp sinn.

Gunnar Heiðar minnir á sig

Gunnar Heiðar Þorvaldsson skoraði þrennu fyrir þýska úrvalsdeildarliðið Hannover í gærkvöldi þegar það burstaði lið Luneburg 7-0 í æfingaleik. Gunnar Heiðar hefur enn ekki fengið tækifæri með liðinu í úrvalsdeildinni, en Hannover er í neðsta sæti deildarinnar eftir tvær umferðir.

Vona að FH misstígi sig enn frekar

Baldur Sigurðsson er leikmaður 14. umferðar landsbankadeildar karla að mati Fréttablaðsins. Hann skoraði bæði mörk Keflavíkur í 2-1 sigri á Íslandsmeisturum FH og verið öflugur með liðinu í allt sumar.

Gatlin í átta ára keppnisbann

Ferill bandaríska spretthlauparans Justin Gatlin er líklega á enda runninn eftir að hinn 24 ára gamli heims- og Ólympíumeistari og heimsmethafi í 100 metra hlaupi var í kvöld dæmdur í 8 ára keppnisbann fyrir að hafa í apríl fallið á lyfjaprófi í annað sinn á ferlinum. Hann hefur verið sviptur heimsmeti sínu í 100 metra hlaupi sem hann átti ásamt Asafa Powell.

Malbranque til West Ham?

Breska sjónvarpið telur sig hafa heimildir fyrir því að enska úrvalsdeildarfélagið West Ham muni reyna að fá til sín franska miðjumanninn Steed Malbranque frá Fulham áður en félagaskiptaglugginn lokar um mánaðarmótin. Malbranque hefur verið settur út í kuldann hjá Fulham og hefur Chris Coleman knattspyrnustjóri þegar lýsti því yfir að hann muni aldrei aftur spila leik fyrir félagið.

Maccabi er hörkulið

Peter Crouch, hinn leggjalangi markaskorari Liverpool, sagði að leikmenn Maccabi Haifa hefðu ekki verið nein lömb að leika sér við eftir að liðin skildu jöfn í síðari leik sínum í forkeppni meistaradeildar Evrópu.

Phillips farinn til West Brom

Enska 1. deildarfélagið West Brom fékk liðsstyrk í dag þegar það keypti fyrrum landsliðsframherjann Kevin Phillips frá Aston Villa á 700 þúsund pund. Villa samþykkti einnig kauptilboð fyrrum félaga Phillips í Sunderland í leikmanninn, en hann kaus að ganga heldur til liðs við West Brom. Phillips er 33 ára gamall og hefur skrifað undir tveggja ára samning.

Auðvelt hjá Tottenham

Tottenham vann í kvöld góðan 2-0 sigur á nýliðum Sheffield United í ensku úrvalsdeildinni í knattspyrnu. Dimitar Berbatov opnaði markareikning sinn fyrir Lundúnaliðið á 7. mínútu og Jermaine Jenas bætti við öðru markinu 10 mínútum síðar. Tottenham réði ferðinni lengst af en náði ekki að bæta við mörkum. Watford og West Ham skildu jöfn 1-1 með mörkum frá Marlon King og Bobby Zamora.

Naumt hjá Liverpool

Liverpool er komið í riðlakeppni meistaradeildar Evrópu eftir 1-1 jafntefli við ísraelska liðið Maccabi Haifa á hlutlausum velli í Kænugarði í kvöld. Liverpool vann því samanlagt 3-2. Peter Crouch kom enska liðinu yfir á 54 mínútu með góðum skalla en ísraelska liðið svaraði aðeins örfáum mínútum síðar. Lengra komust Maccabi-menn þó ekki og Liverpool slapp með skrekkinn.

Tottenham yfir gegn Sheffield United

Leikmenn Tottenham Hotspur eru að eiga nokkuð náðugan dag gegn Sheffield United í viðureign liðanna í ensku úrvalsdeildinni og hafa yfir 2-0 í leikhléi. Dimitar Berbatov skoraði sitt fyrsta mark fyrir Tottenham á 7. mínútu og Jermaine Jenas bætti öðru við aðeins 10 mínútum síðar. Robbie Keane átti stóran þátt í báðum mörkunum og nýliðarnir frá Sheffield virðast fá svör eiga við leik Lundúnaliðsins.