Milljón indverskra bankastarfsmanna í verkfalli í dag

Nærri milljón indverskra ríkisbankastarfsmanna eru í verkfalli í dag vegna þrýstings frá stjórnvöldum um endurbætur í bankakerfinu. Fréttavefur BBC skýrði frá þessu í morgun.

Stórreykingamenn líklegri til að skilja

Stórreykingamenn eru líklegri til að eiga að baki misheppnað hjónaband en þeir sem ekki reykja, samkvæmt niðurstöðum danskrar könnunar á reykvenjum þjóðarinnar. 30% af þeim Dönum sem reykja 15 sígarettur eða meira eru fráskildir en aðeins 13,6% þeirra eru giftir.

Vill vernda hjónabandið fyrir samkynhneigðum

George W. Bush, forseti Bandaríkjanna, ætlar sér að nota úrskurð dómara í New Jersey í Bandaríkjunum um að leyfa hjónabönd samkynhneigðra til þess að koma íhaldssömum kjósendum til þess að kjósa í kosningum til öldungadeildar þingsins, sem fara fram 7. nóvember næstkomandi.

Erkibiskup styður múslimakonur

Erkibiskupinn af Kantaraborg hefur blandað sér í deilurnar um trúartákn, í Bretlandi, og tekur málstað múslimakvenna sem vilja bera slæður.

Vill hækka skatt á áfengi til að berjast gegn unglingadrykkju

Patricia Hewitt, heilbrigðisráðherra Bretlands vill hækka skatt á áfengi sem selt er í Bretlandi, sér í lagi á áfengum gosdrykkjum, til að draga úr unglingadrykkju. Hann segist ætla að biðja Gordon Brown, fjármálaráðherra um að setja skattahækkunina inn í næsta fjárlagafrumvarp.

Serbar að innlima Kosovo-hérað í nýrri stjórnarskrá

Um næstu helgi munu Serbar kjósa um nýja stjórnarskrá sem er ætlað að innlima Kosovo-hérað, þrátt fyrir viðræður við Sameinuðu þjóðirnar varðandi hugsanlega framtíð héraðsins.

Þýsku hermennirnir reknir úr hernum

Þýski herinn hefur rekið tvo hermenn úr hernum vegna mynda sem þýska dagblaðið der Bild birti af þeim þar sem þeir stilltu sér upp með hauskúpu í Afganistan. Myndir af þýskum hermönnum með hauskúpur hafa birtust í ýmsum þýskum fjölmiðlum í gær og fyrradag og hafa verið fordæmdar af þýskum stjórnmálamönnum og heryfirvöldum. Myndirnar eru sagðar vera frá 2003 og 2004.

4 slökkviliðsmenn týndu lífi í Palm Springs

Fjórir slökkviliðsmenn týndu lífi og einn brenndist illa þar sem þeir börðust við kjarrelda nærri Palm Springs í Bandaríkjunum í dag. Talið er að eldarnir logi nú á 4.000 hektara svæði og grunur leikur á að um íkveikju sé að ræða. 700 íbúum í nærliggjandi þorpum hefur verið fyrirskipað að flytja frá heimilum sínum. Sumir hafa þurft að fara að heiman án nokkurs fyrirvara og þurft að skilja eftir eigur og gæludýr.

Um 200 líkamshlutar hafa fundist

Um það bill 200 hundruð líkamshlutar hafa fundist þar sem Tvíburaturnarnir stóðu áður í New York síðan líkamsleifar fundust í holræsi undir staðnum fyrir viku. Turnarnir hrundu í hryðjuverkaárásunum á Bandaríkin 11. september 2001. Lík 1.150 fórnarlamba í turnunum hafa ekki fundist.

Tupperware-listaverk til sýnis

Tupperware er hægt að nota á margan hátt, til að geyma spagettí, til að geyma hafragraut í og hita hann, auk þess sem tupperware er notað til að halda mat ferskum. Það kann því að hljóma sérkennilega að Tupperware sé einnig notað í töskugerð eða listsköpun hvers konar.

Svartur og hvítur

Reynst getur erfitt að þekkja í sundur tvíbura, sérstaklega ef þeir eru eineggja. Tvíburarnir sem Kerry Richardsson, frá Middlesbro á Englandi, eignaðist fyrir þrettán vikum eru hins vegar eins og svart og hvítt, í bókstaflegri merkingu.

Andy Taylor hættur í Duran Duran

Andy Taylor, gítarleikari bresku hjómsveitarinnar Duran Duran, er hættur að spila með félögum sínum. Sem stendur er hljómsveitin í tónleikaferð um heiminn og næsti viðkomustaður eru Bandaríkin. Fimm ár eru síðan þessi vinsæla hljómsveit níunda áratugs síðustu aldar kom aftur saman á ný.

Á leið til sólarinnar

Tveimur geimförum var í morgun skotið upp frá Canaveral-höfða í Flórída í átt til sólarinnar. Geimförin eiga að taka þrívíddarmyndir af sólstrókum en þeir valda norðurljósunum fögru.

Saklaust fólk drepið

Talið er að tugir óbreyttra borgara hafi fallið í árásum Atlantshafsbandalagsins á bækistöðvar talibana í Suður-Afganistan í vikunni. Talsmenn NATO saka talibana um skýla sér bak við saklaust fólk í bardögum en heimamenn segja þá á bak og burt.

4 fórust þegar flugvél sænsku strandgæslunnar hrapaði

Fjórir týndu lífi þegar flugvél sænsku strandgæslunnar hrapaði í Falsterbro-sund í Suður-Svíþjóð skömmu eftir hádegi í dag. Að sögn vitna losnaði annar vængurinn frá flugvélinni áður en hún hrapaði. Fjórir voru um borð og hafa allir fundist, látnir.

Kjarreldar ógna stóru svæði nærri Los Angeles

Rúmlega 200 íbúum í tveimur smábæjum nærri Palm Springs í Los Angeles hefur verið fyrirskipað að yfirgefa heimili sín vegna mikilla kjarrelda sem breiðast hratt út á svæðinu. Heitir vindar blása á svæðinu og hraða því að eldarnir breiði úr sér. Þeir kviknuðu skömmu eftir miðnætti og 6 klukkustundum síðar höfðu þeir læst sig í 324 hektara landsvæði.

Rútslys í Pakistan

12 týndu lífi og 60 særðust þegar rúta skall á bíl í Suður-Pakistan. Áreksturinn var svo harður að rútan og bíllinn köstuðust í nærliggjandi gil. Slysið varð nærri bænum Rohri, um 360 kílómetra norð-austur af hafnarborginni Karachi.

Útlit fyrir að Hillary nái endurkjöri

Allt stefnir í að Hillary Rodham Clinton nái endurkjöri sem öldugadeildarþingmaður fyrir New York í næsta mánuði. Ástand mála mun gott í New York, hún vinsæl meðal flestra, jafnvel þeirra sem kusu hana ekki fyrir 6 árum. Kjósendur í New York segjast flestir ætla að kjósa hana í forsetakosningunum 2008 verði hún í kjöri.

Vilja bæta ímynd Ísraelsríkis

Berrössuðum Grænfriðungi hótað brottrekstri

Mary krónprinsessa Danmerkur með barni

Mary krónprinsessa Danmerkur og Frederik prins eiga von á öðrum erfingja, samkvæmt tilkynningu frá dönsku konungsfjölskyldunni. Áætlað er að Mary fæði barnið í byrjun maí á næsta ári.

Hæstiréttur Danmerkur stórherðir refsingar fyrir brot gegn börnum

Hæstiréttur Danmerkur hefur tekið þá stefnu að herða til muna refsingar fyrir kynferðisbrot gegn börnum, og segir að með því sé verið að taka tillit til samþykktar danska þingsins árið 2002 um herta refsilöggjöf

Löglegt að hæða og niðurlægja samkynhneigða í Færeyjum

Í Færeyjum er löglegt að hóta, hæða og niðurlægja homma og lesbíur. Danskur háskólanemi hefur hafið alþjóðlega undirskriftasöfnun, til þess að fá þessu breytt.

Rússar ætla hugsanlega að slaka á þvingunaraðgerðum gagnvart Georgíu

Aðalritari Norður-Atlantshafsbandalagsins, Jaap de Hoop Scheffer, gaf til kynna eftir fundahald í Moskvu í morgun að Rússar myndu slaka á þvingunum sem settar voru á Georgíu.

Tvö bresk börn látin vegna eitrunar, foreldrarnir í dái

Tvö bresk börn fundust látin á hótelherbergi á grísku eyjunni Korfú í morgun. Foreldrar þeirra lágu við hlið þeirra, meðvitundarlaus en enn með lífsmarki. Frumrannsókn lögreglu bendir til að börnin hafi látist af völdum eiturs og rannsakar lögreglan nú hvort eitrað hafi verið fyrir fjölskyldunni. Talið er að börnin hafi verið látin í 8-9 klukkutíma þegar herbergisþerna kom að fjölskyldunni.

Arabar útlægir frá Níger

Stjórnvöld í Níger hafa rekið fjölda araba frá landinu, mest hirða með hjarðir sínar. Þeim hefur verið fylgt að landamærunum við Tsjad og þeir sendir yfir landamærin. Embættismaður við landamærin sagði að þarna væri verið að framkvæma umdeilda ákvörðun um að reka um 150 þúsund Mahamid araba frá landinu.

Mikil óánægja í Nígeríu vegna framferðis olíufyrirtækja í umhverfismálum

Þorpsbúar sem réðust á olíuhreinsunarstöðar við ósa ánnar Níger í Nígeríu sættust á að yfirgefa þær eftir að hafa náð samningum um auknar bætur við vestrænu fyrirtækin sem eiga stöðvarnar.

Schröder skýtur á Bush í æviminningum sínum

Gerhard Schröder, fyrrverandi kanslari Þýskalands, gagnrýnir George Bush Bandaríkjaforseta fyrir endalausar vísanir í Guð í aðdraganda Íraksstríðsins í nýútkomnum æviminningum sínum.

Suður-Kórea tekur þátt í refsiaðgerðum gegn Norður-Kóreu

Suður-Kórea tilkynnti í morgun að ríkisborgurum Norður-Kóreu sem vinna við kjarnorkuáætlun landsins, verði ekki hleypt yfir landamæri ríkjanna.

Léttklæddar konur biðja um að þeim sé nauðgað

Æðsti klerkur múslima, í Ástralíu, hefur vakið mikla reiði með því að segja að léttklæddar konur biðji um að þeim sé nauðgað. Jafnréttisráðgjafi ríkisstjórnarinnar vill að klerkurinn verði rekinn úr landi.

Ritstjórar Jyllands-Posten sýknaðir af kæru vegna Múhameðsmyndanna

Héraðsdómur í Árósum í Danmörku hefur sýknað 2 ritstjóra Jyllands-Posten í einkamáli sem sjö samtök múslíma í Danmörku höfðuðu vegna skopmyndanna sem birtust af Múhameð spámanni fyrir tæpu ári síðan. Dómarinn úrskurðaði, að þó að múslimar víða um heim hefðu móðgast vegna myndanna, þá væri ósannað að myndunum hafi verið ætlað að særa múslima.

Alræmdur fjöldamorðingi tekinn af lífi í Flórída

Danny Harold Rolling, einn alræmdasti fjöldamorðingi Flórídaríkis, var tekinn af lífi með banvænni sprautu í fangelsi í Flórída í gærkvöld. Rolling var árið 1994 dæmdur til dauða eftir að hann viðurkenndi að hafa myrt fimm nemendur í háskólabænum Gainsville í Flórída á hrottalegan hátt árið 1990, en hann notaði veiðihníf við morðin.

Matvælahjálp Sameinuðu þjóðanna sér fram á matvælaskort í suðurhluta Afríku

Matvælahjálp Sameinuðu þjóðanna sagði í morgun að milljónir manna í suðurhluta Afríku eigi eftir að líða matarskort vegna þess að hópur ríkra landa hefur ekki staðið við skuldbindingar sínar.

Haraldur krónprins hótaði að hefja óvígða sambúð með Sonju

Haraldur konungur Noregs verður sjötugur 21. febrúar næstkomandi og í tilefni af því hefur ævisaga hans verið skráð. Í henni kemur meðal annars fram að það vakti litla hrifningu hjá bæði hirðinni og þjóðinni þegar hann hóf samband sitt við Sonju Haraldsen.

Herflugvélar NATO bana óbreyttum borgurum í Afganistan

Herflugvélar frá Atlantshafsbandalaginu (NATO) bönuðu að minnsta kosti 50 óbreyttum borgurum í Suður-Afganistan, aðalega konum og börnum, í árás sem var gerð á meðan stærsta hátíð múslima, Eid al-Fitr, stóð yfir.

Loftlagsbreytingar geti leitt til heimskreppu

Ef ríki heimsins grípa ekki til aðgerða gegn loftlagsbreytingum er hætta á mikilli heimskreppu á öldinni. Þetta er meðal þess sem fram kemur í nýrri skýrslu sem fyrrverandi aðalhagfræðingur Alþjóðabankans hefur unnið fyrir bresk yfirvöld um áhrif loftlagsbreytinga á efnahagkerfi heimsins.

Ofurfyrirsæta handtekin

Breska lögreglan handtók í dag ofurfyrirsætuna Naomi Campbell. Lögregla handtók hin 36 ára gömlu fyrirsætu þar sem hún var stödd í húsi í Westminster í Lundúnum. Hún var þegar færð til yfirheyrslu. Ekki er vitað hver ástæðan er fyrir handtökunni.

Samkynhneigð pör fá rétt á við gagnkynhneigð í New Jersey

Dómstóll í New Jersey í Bandaríkjunum úrskurðaði í dag að samkynhneigðum pörum yrðu veitt sömu réttindi og giftum, gagnkynhneigðu fólki. Dómstóllinn lætur það svo í hendur löggjafans í ríkinu að ákveða hvort leyfa eigi samkynhneigðum að ganga í hjónaband.

Samkomulag um annað ríki en Gvatemala og Venesúela

Fulltrúar Gvatemala og Venesúela hafa komist að samkomulagi um að binda enda á baráttu landanna um sæti til 2 ára í Öryggisráði Sameinuðu þjóðanna. Eftir er þó að semja um hvaða ríki fái að sækja eitt um sætið sem er annað tvegjga sem tekin eru frá fyrir lönd rómönsku Ameríku. Atkvæða greiðslur á Allsherjarþingi SÞ hófust á ný í dag og engin niðurstaða fengin enda þarf 2/3 atkvæða til að hreppa sætið.

Frambjóðandi íhaldsmanna með forskot á andstæðing sinn

Alvara Noboa, frambjóðandi íhaldsmanna í forsetakosningunum í Ekvador, hefur nú 16% forskot á Rafael Correa, frambjóðanda vinstrimanna, fyrir seinni umferð forsetakosninganna þar í landi.

Deilur um trúartákn harðna í Evrópu

Deilur um trúartákn, svosem krossa og blæjur, fara harðnandi í Evrópu. Deilt er um hvort eigi að banna þau með öllu á opinberum vettvangi eða hvort menn eigi að fá að velja sjálfir hvort þeir hafa þau uppi. Síðast blossuðu upp deilur um þetta í Bretlandi.

Hneyksli í uppsiglingu í Þýskalandi

Hneyksli virðist í uppsiglingu í Þýskalandi eftir að dagblaðið Bild birti myndir af brosandi þýskum friðargæsluliðum í Afganistan að leika sér með hauskúpu. Á einni myndinni má sjá einn friðargæsluliðann halda á höfuðkúpunni upp að kynfærum sínum.

Madonna svarar fyrir sig

Bandaríska poppsöngkonan Madonna segir ekkert athugavert við hvernig hún stóð að ættleiðingu á malavískum dreng á dögunum.

Óttast ekki lögsóknir

Norskum tölvuref, sem búsettur er í Bandaríkjunum, hefur tekist að brjóta dulkóðun á iTunes-forriti Apple-fyrirtækisins.

Forsætisráðherra Íraks ekki hafður með í ráðum

Bandarískar og íraskar hersveitir gerðu í morgun áhlaup á Sadr-borg, fátækrahverfi í norð-austurhluta Bagdad, höfuðborgar Íraks. Hverfið er höfuðvígi herskáa sjía-klerksins Moqtada al-Sadr. Minnst 4 féllu í átökum og 18 særðust. Nouri al-Maliki, forsætisráðherra Íraks, segist ekkert hafa vitað af árásinni eða gefið leyfi fyrir henni. Hann hafi ekki verið hafður með í ráðum.