Tals­maður Trumps rekinn eftir brösug­lega byrjun

Frá þessu greinir bandaríski miðillinn The New York Times en þar segir einnig að hún hafi sinnt starfinu í minna en viku. Zacharia er 42 ára gömul og hafði starfað í skamman tíma fyrr á árinu sem talsmaður heimavarnaráðuneytis Bandaríkjanna. Þá hefur hún einnig verið gestur hjá bæði Fox News og Newsmax. 

Ekki draumabyrjun í nýju starfi

Þá var blaðamannafundurinn síðasta þriðjudag umræddur en hann stóð yfir í um fjórtán mínútur. Þar svaraði hún einungis spurningum frá þremur blaðamönnum og á þeim tíma leit hún ítrekað niður og virtist lesa handrit. Hún muldraði á köflum og ruglaðist á forsetanum og eiginmanni sínum.

Greint var frá því stuttu eftir fundinn að samstarfsmenn hennar í Hvíta húsinu væru byrjaðir að velta vöngum yfir því hve lengi hún geti varið í starfinu. Donald Trump Bandaríkjaforseti gekk úr Hvíta húsinu með Zacharia eftir fundinn á þriðjudag þar sem blaðamenn biðu eftir honum. Þar sagði hann að hún hefði staðið sig mjög vel.

Þegar Trump tilkynnti að hún yrði upplýsingafulltrúi hans titlaði hann hana sem lögmann. Trump var í gær spurður að því hvar hún hefði staðist lögmannapróf og leit hann þá á hana og Zacharia svaraði: „Þegar ég flutti til Kína.“

Samkvæmt heimildarmönnum CCN í Hvíta húsinu á Trump sjálfur að hafa beðið Zacharia um að halda blaðamannafundinn og vakti það furðu, þar sem hún var á þeim tímapunkti mjög ný í starfinu.

Hvatti hana til að hætta

Í umfjöllun The New York Times um uppsögnina segir einnig að Trump hafi talað við fréttamenn í dag og greint frá því að hann hefði hvatt Zacharia til að „endurskoða“ starfið.

„Satt best að segja, ef ég væri þú, myndi ég endurskoða þetta,“ hafi hann sagt þegar hann hafi rifjað upp samtal sitt við fjölmiðlafulltrúa sinn. 

„Katie, þarftu á þessu að halda? Ég held að þú þurfir ekki á þessu að halda,“ sagðist hann einnig hafa sagt við hana.

Myndband af samskiptunum þar sem Trump segir Zacharia hafa fengið slæma útreið í fjölmiðlum og á samfélagsmiðlum má sjá í spilaranum hér að ofan.

Þá hafði einnig verið greint frá því að Zacharia hafi fallið á lögmannsprófinu þrátt fyrir að hafa ítrekað verið titluð af Trump sem lögmaður. Í frétt The New York Times frá því fyrr í gær segir að hún hafi sagt spyrli í þættinum Real America’s Voice frá því að hún hafi þreytt lögmannspróf en fallið. 

Zacharia var sem fyrr segir rekin eftir aðeins fimm daga í starfi, sem gerir starfstíma hennar enn styttri en hina alræmdu tíu daga sem Anthony Scaramucci entist sem samskiptastjóri Hvíta hússins árið 2017. 

Fréttin hefur verið uppfærð.