„Ég hef miklar á­hyggjur af Valsstelpunum“

Valur hefur misst Ástu Júlíu Grímsdóttur til Njarðvíkur og þá er Guðbjörg Sverrisdóttir hætt. Nokkur ár eru síðan Hallveig Jónsdóttir hætti og þá er Dagbjört Dögg Karlsdóttir komin í barneignaleyfi.

„Þetta gamla Valslið sem við þekktum, það er búið að skipta því út fyrir yngri stelpur,“ sagði Helena í upphitunarþætti Körfuboltakvölds á Sýn Sport Íslandi á mánudagskvöld. Brot úr þættinum má sjá hér að neðan en leikur Vals við meistarakandídata Njarðvíkur er svo sýndur klukkan 19:15 í kvöld.

„Ég hef miklar áhyggjur af Valsstelpunum. Auðvitað er alltaf gott að fá til sín útlendinga sem þú þekkir en Alyssa [Cerino] sem einhver leikmaður inní teig… við sáum það öll að henni finnst það ekki gaman. Henni finnst ekki gaman að láta ýta í sig eða vera að ýta öðrum og maður hugsar með sér; Hver ætlar að vera þessi týpa? Þóranna getur það auðvitað en hún er ekki há í loftinu. Það vantar alls konar í liðið og manni líður eins og þær séu frekar þunnar,“ sagði Helena.

Rúnar Ingi Erlingsson tók í sama streng:

„Stöðugleiki er það sem ég spyr mig um. Mér fannst þær vera alls konar í fyrra. Þær áttu virkilega flottar frammistöður en svo var algjört þrot inn á milli. Jafnvel var fyrri hálfleikur góður en seinni hálfleikur út og suður. Mér fannst við sjá þetta í úrslitakeppninni líka, í einvíginu á móti Grindavík. En það eru gæði þarna og spennandi leikmenn,“ sagði Rúnar og nefndi sérstaklega Dzönu Crnac sem kominn er til Vals frá Ármanni.