Fjórfaldur heims­meistari slasaður eftir að brotist var inn til hans

Grímuklæddir menn brutust inn í hús fjölskyldu Prost á meðan hún var heima og hótuðu henni. Á meðan hótanirnar áttu sér stað meiddu innbrotsþjófarnir Prost í höfðinu og neyddu svo annan meðlim fjölskyldunnar til að opna öryggisskáp með verðmætum sem þjófarnir hlupu á brott með. Blick greinir fyrst frá þessu

Prost er 71 árs en ekki er vitað hversu alvarleg höfuðmeiðslin eru né verðmæti þess sem var í öryggisskápnum að svo stöddu.

Lögreglan í Sviss, Frakklandi og landamæraeftirlitið vinna saman að rannsókn málsins.

Alain Prost er einn sigursælasti Formúlu 1-ökuþór allra tíma og varð fjórum sinnum heimsmeistari á þrettán ára ferli. Hann er líklegast þekktastur fyrir deilur sem hann átti við Ayrton Senna sem var liðsfélagi hans hjá McLaren í tvö ár eða þangað til Prost fór yfir til Ferrari vegna þess að hann gat ekki verið með Senna í liði lengur.