Samningur í höfn: Þjóð­verjar treysta á Al­freð fram yfir ÓL í Los Angeles

Alfreð, sem er 66 ára gamall, var með samning sem runnið hefði út eftir heimsmeistaramótið sem fram fer í Þýskalandi í janúar á næsta ári.

Óvissa ríkti um framhaldið þó að Alfreð væri fyrir nokkru búinn að lýsa yfir áhuga á að halda áfram með þýska liðið sem hann stýrði til silfurverðlauna á EM í janúar sem og á síðustu Ólympíuleikum.

Nú hefur Alfreð hins vegar verið treyst fyrir næstu stórmótum; HM í janúar, EM 2028 og svo Ólympíuleikunum í Los Angeles 2028 ef Þýskaland kemst þangað.

„Áreiðanlegur maður í alla staði“

„Alfreð er ekki aðeins áhrifamikill þjálfari, heldur einnig áreiðanlegur maður í alla staði. Það endurspeglast í samskiptum síðustu vikna, sem hafa leitt til þessa árangurs með gagnkvæmu trausti og mikilli yfirvegun,“ segir Ingo Meckes, íþróttastjóri þýska handknattleikssambandsins, í fréttatilkynningu.

„Það er rökrétt að Alfreð Gíslason verði áfram landsliðsþjálfari okkar og beri þar með ábyrgð á öllu Ólympíutímabilinu. Hann hefur endurnýjað landsliðið okkar á undanförnum árum með fjölmörgum leikmönnum fæddum árið 2000 og síðar og þannig byggt það upp til framtíðar, jafnvel út fyrir HM 2027. Með Ólympíuleikunum 2028 getur Alfreð fullkomnað verk sitt fyrir þýskan handbolta,“ sagði Meckes.

Þakklátur fyrir traustið eftir að hafa endurnýjað liðið

Í tilkynningunni er bent á að frá því að Alfreð valdi sinn fyrsta landsliðshóp, í mars 2020, voru aðeins markvörðurinn Andreas Wolff, línumennirnir Johannes Golla og Jannik Kohlbacher, auk örvhentu skyttanna Franz Semper og Juri Knorr, í hópnum sem vann silfur á EM í janúar. Allir aðrir festu sig í sessi í landsliðinu undir stjórn Íslendingsins. 

„Að vera landsliðsþjálfari þýska handboltalandsliðsins er meira en bara starf – því finn ég fyrir á hverjum heimaleik, eins og síðast með 19.750 áhorfendum í Köln,“ segir Alfreð. 

„Það var mitt verkefni að endurnýja landsliðið. Það hefur okkur tekist. Ég er þakklátur fyrir traustið að fá að halda þessu starfi áfram til 2028. Og ég er sannfærður um að við getum tekið síðasta skrefið með leikmönnum okkar. Silfurverðlaunin á Ólympíuleikunum 2024 og Evrópumeistaramótinu 2026 eru okkur öllum hvatning. Sagan okkar er langt frá því að vera öll.“

Lýsir Alfreð sem kletti í sjónum

Andreas Michelmann, forseti þýska handknattleikssambandsins, segir: 

„Ég gleðst fyrir hönd þýsks handbolta, okkar og Alfreðs að við höfum náð þessari samningsframlengingu. Auk handboltahæfileika sinna er og verður Alfreð kletturinn í hafsjó. Stöðugleiki hans veitir okkur æðruleysi og þar með aukið öryggi á þessum sífellt órólegri tímum. Ég þakka íþróttastjóra okkar, Ingo Meckes, fyrir skýrt, vel skipulagt og ítarlegt ferli sem við lukum á réttum tíma fyrir sumarið, eins og áætlað var.“