Titillinn undir í odda­leik: „Eitt­hvað magnað sem ræður úr­slitum í kvöld“

Magnaður sigur FH í ótrúlegum handboltaleik sem var tvíframlengdur og réðist á lokasekúndum seinni framlengingarinnar í fjórða leik einvígisins gegn Val í Kaplakrika á dögunum knúði fram oddaleik kvöldsins og setur tóninn fyrir úrslitastund á Hlíðarenda.

„Ég vonast eftir því að þetta verði með svipuðum hætti og síðast. Ég held að þetta geti alveg farið í einhverjar framlengingar, dramatík og einhver VAR móment sem gætu jafnvel ráðið úrslitum,“ segir Einar Jónsson handboltaþjálfari og sérfræðingur í samtali við Vísi.

„Fram að síðasta leik voru þetta fremur sannfærandi sigrar á báða bóga í fyrstu þremur leikjunum. Svo fengum við þessa alvöru bombu í leik fjögur. Það verður eitthvað magnað sem ég held að ráði úrslitum í kvöld.“

Heimavöllurinn ofmetinn?

Liðin hafa varið heimavelli sína í úrslitaeinvíginu. En vinnur það með Val í kvöld á Hlíðarenda? 

„Miðað við hvernig þetta hefur verið þá hefur heimavöllurinn alveg gríðarlegt vægi. Ég geri náttúrulega ráð fyrir því að Valsmenn verði í meirihluta í stúkunni. Auðvitað er hægt að segja að þeir hafi eitthvað smá forskot en við erum nú bara á Íslandi. Heimavöllurinn kannski telur ekki eins mikið og við sjáum út í heimi að mínu mati. Ég held að bæði þjálfarar og leikmenn nái að loka á þetta. „Ballen er rund“ eins og við segjum, völlurinn 20x40. Fókusinn verður þar.“

Engir aukaleikarar

Bæði lið hafa yfir að skipa ungum leikmönnum sem hafa skarað fram úr í vetur. Hinn átján ára gamli Ómar Darri Sigurgeirsson í liði FH fór á kostum í síðasta leik og skoraði þrettán mörk, liðsfélagi hans Garðar Ingi Sindrason sem gengur til liðs við Gummersbach í Þýskalandi eftir tímabilið er alltaf hættulegur og sama má segja um Gunnar Róbertsson hjá Val. Þeir gætu ráðið úrslitum í kvöld.

„Já alveg klárlega. Þetta er það fallega við þetta einvígi og hefur svo sem verið sagan í vetur líka. Bæði þessi lið hafa stráka sem hafa heldur betur tekið miklum framförum í vetur eftir því sem hefur liðið á tímabilið. Þetta eru engir aukaleikarar. Þeir eru ekki að taka brauðmola frá einhverjum öðrum. Þetta eru bara mennirnir sem eru að leiða liðin sín.  

Það er ótrúlega gaman að sjá svona unga stráka orðna svona ofboðslega þroskaða og orðna hrikalega góða í handbolta. Ég á von á því já. Ég held að þessir strákar sem við höfum talað um hérna, að einhver þeirra geti stolið sviðsljósinu og orðið leikbreytir fyrir annað hvort liðið. Já ég á hundrað prósent von á því að þessir strákar eigi eftir að halda áfram að skila sínu í þessu einvígi. Þeir hafa verið frábærir.“

Tvö bestu lið landsins í vetur að mætast í hreinum úrslitaleik um Íslandsmeistaratitilinn. 

„Það lið sem vinnur í kvöld á það bara hundrað prósent verðskuldað og það lið sem tapar verðskuldar það reyndar líka að vinna þetta. Það er bara eitt lið sem stendur uppi sem sigurvegari. Það er ómögulegt að spá um það en mín tilfinning er að Valur vinni þetta í framlengingu í einhverju hádrama.