Wembanyama setti met og varði tólf skot en Úlfarnir unnu

Victor Wembanyama fór mikinn í vörninni í leiknum í San Antonio og varði tólf skot sem er met í úrslitakeppni NBA. Frakkinn, sem er nýkrýndur varnarmaður ársins í NBA, skoraði einnig ellefu stig og tók fimmtán fráköst. Hann hitti hins vegar aðeins úr fimm af sautján skotum sínum.

Flestum að óvörum sneri Anthony Edwards aftur á völlinn eftir að hafa meiðst í einvígi Minnesota og Denver Nuggets. Hann byrjaði á bekknum en spilaði 25 mínútur. Edwards skoraði átján stig í leiknum, þar af ellefu í 4. leikhluta.

„Ég veit að viðvera mín róar alla. Ég er ekki að segja að það sé ekki pressa á liðsfélögum mínum en það að vita af mér inni á vellinum og að ég sé klár að spila tekur pressu af öllum. Ég gerði það sem ég geri best, að reyna að setja boltann ofan í körfuna,“ sagði Edwards eftir leikinn.

Julius Randle skoraði 21 stig fyrir Minnesota og tók tíu fráköst. Hjá San Antonio var Dylan Harper stigahæstur með átján stig.

Knicks átti ekki í miklum vandræðum með að leggja Sixers að velli í Madison Square Garden. Knicks er fyrsta liðið í sögu NBA sem vinnur þrjá leiki í úrslitakeppninni í röð með 25 stigum eða meira. Sigurinn á Sixers, með 39 stigum, var stærsti sigur Knicks í úrslitakeppninni í sögu félagsins.

Jalen Brunson skoraði 35 stig fyrir Knicks og hitti úr tólf af átján skotum sínum. OG Anunoby skoraði átján stig og Karl-Anthony Towns og Mikal Bridges sitt hvor sautján stigin.

Fátt var um fína drætti hjá Sixers. Paul George skoraði sautján stig og Joel Embiid fjórtán en átta af ellefu skotum sem hann tók í leiknum geiguðu.