Rændir í miðju lyfja­prófi

Eftir nánast fullkomið tímabil hingað til tapaði Magdeburg óvænt í hádramatískum undanúrslitaleik gegn Bergischer á laugardaginn og varð svo einnig að sætta sig við tap gegn Lemgo í leik um bronsverðlaunin í gær.

Ofan á þetta bættist svo að eigum Svíanna Albins Lagergren og Felix Claar var stolið á meðan að þeir voru í lyfjaprófi eftir leikinn.

Frá þessu greinir þýski miðillinn Bild og segir að Svíarnir hafi skilið sínar persónulegu eigur eftir í búningsklefanum á meðan að þeir fóru í lyfjaprófið. Liðsfélagar þeirra hafi hins vegar ekki beðið þar eftir þeim heldur úti í liðsrútunni.

Á meðan fóru óprúttnir aðilar inn í búningsklefann og létu þar greipar sópa. Þeir stálu meðal annars skóm og heyrnartólum.

Forráðamenn Magdeburg höfðu strax samband við lögreglu en fengu ekki mikla hjálp. „Tilkynnið þetta rafrænt. Við þurfum að glíma við önnur verkefni í Köln,“ sagði í svari lögreglunnar.

„Við viljum ekki gera stórt mál úr þessu. En þetta passar vel við restina af helginni,“ sagði Marc-Henrik Schmedt, framkvæmdasjtóri Magdeburgar.