Stórleikur Hauks dugði ekki til sigurs

Viggó Kristjánsson var fjarri góðu gamni fyrir Erlangen í dag en Andri Már Rúnarsson stóð vaktina í liði heimamanna og skoraði alls fimm mörk og gaf þrjár stoðsendingar.

Gestirnir í liði Löwen höfðu stjórn á leiknum í fyrri hálfleik og leiddu með þremur mörkum í hálfleik 10-13. 

En í seinni hálfleik bitu heimamenn í liði Erlangen frá sér, sneru leiknum sér í vil og fóru að lokum með tveggja marka sigur, 29-27. 

Stórleikur Hauks Þrastarsonar dugði ekki til hjá Löwen í dag en íslenski landsliðsmaðurinn skoraði átta mörk og gaf níu stoðsendingar.

Með sigrinum fer Erlangen upp í 13.sæti deildarinnar og er þar með nítján stig. Löwen er í áttunda sæti með 31 stig.

Þá var Einar Ólafsson í sigurliði HSV sem hafði betur gegn Minden, 29-30. Sigurinn lyftir HSV upp í tíunda sæti deildarinnar.