Keflavíkurkonur skutu Stjörnuna á kaf og þessi lið mætast í úr­slita­keppninni

Keflavík vann 90-57 sigur á Stjörnunni en Tindastóll vann 90-68 sigur á Hamar/Þór í Síkinu á Sauðárkróki.

Keflavíkurkonur hafa ekki verið alltof sannfærandi í vetur en þær sýndu í kvöld að þær verða stórhættulegar í úrslitakeppninni.

Stjörnukonur voru sex stigum yfir eftir fyrsta leikhlutann, 21-15, en Keflavik vann annan leikhlutann 22-8 og þriðja leikhlutann 39-18. Eftir það var engin spurning um sigurvegara.

Sara Rún Hinriksdóttir var frábær með 22 stig og 5 stoðsendingar á 23 mínútum og Thelma Dís Ágústsdóttir hitti úr sex af átta þriggja stiga skotum sínum og endaði með 20 stig á 23 mínútum. Keishana Washington bætti við 13 stigum og 5 stoðsendingum.

Eva Wium Elíasdóttir var atkvæðamest hjá Stjörnunni með 16 stig og Stina Almqvist skoraði 14 stig.

Tindastólskonur voru sjö stigum yfir í hálfleik, 42-35, og keyrðu síðan yfir gestina með því að vinna þriðja leikhlutann 29-12.

Madison Anne Sutton gældi við þrefalda tvennu með 25 stigum, 11 fráköstum og 9 stoðsendingum. Marta Hermida skoraði 26 stig og Roselis Silva var með tíu stig og þrettán stoðsendingar. Inga Sólveig Sigurðardóttir var stigahæsti íslenski leikmaður liðsins með tíu stig.

Jóhanna Ýr Ágústsdóttir var með 17 stig og fimm þrista fyrir Hamar/Þór og Mariana Duran var með 15 stig. Jadakiss Guinn og Jovana Markovic skoruðu báðar tólf stig.