Heim í hlýjuna en alls ekki á heim­leið

„Það er búið að vera mjög kalt og langur vetur þarna úti. Þá er gott að komast aðeins heim og hitta fjölskylduna og vini. Þetta er kærkomið,“ segir Elvar Már sem leikur með Anwil Wloclawek í Póllandi.

Ofsakuldi hefur herjað á Pólland í vetur og hafandi verið í Grikklandi síðustu tvö ár er Elvar ekki vanur því að koma hingað heim í hlýjuna í febrúar.

„Það er langt síðan að ég fór að koma heim og það er hlýrra hér en úti. Það er fín tilbreyting samt,“ segir Elvar sem hefur gengið nokkuð vel á nýjum stað.

„Þetta er búið að vera fínt í vetur, en mjög kalt og dimmt síðustu mánuði. Það fer birta til núna. Það eru tveir til þrír mánuðir eftir af tímabilinu og ég er bara jákvæður.“

Kann vel við sig í Póllandi

„Mér finnst oft haldast í hendur þegar gengur vel inni á vellinum er líðanin utan vallar líka betri. Þetta hefur verið smá upp og niður hjá okkur í vetur en ég er hef verið frekar stabíll. Ég reyni alltaf að skila bara mínu,“ segir Elvar Már.

Elvar fékk smá hvíld áður en æfingar landsliðsins hófust og gat notið tímans í faðmi fjölskyldunnar áður en næsta verkefni tók við.

„Ég er í fínu formi og hef fengið fína hvíld. Ég þurfti svolitla hvíld fyrir líkama og sál, ég fékk alveg viku fyrir gluggann í smá hvíld hérna heima. Ég kem fullur tilhlökkunar til baka.“

Stanslaust flakk

Kona Elvars, Ína María Einarsdóttir, býr ásamt syni þeirra hér heima á Íslandi. Mikið flakk hefur verið á kappanum síðustu ár og hann aðeins tekið eitt tímabil með hverju liði fyrir sig síðasta áratuginn eða svo.

Eftir að hafa spilað háskólabolta í Bandaríkjunum kom Elvar stuttlega heim til Njarðvíkur frá Frakklandi 2018. Hann fór þaðan til Svíþjóðar, svo til Litáen, Belgíu og Ítalíu, áður en hann fór aftur til Litáen og hefur síðustu tvö ár verið með sitthvoru liðinu í Grikklandi. Áður en hann fór svo til Póllands í sumar.

„Það er ekkert að bögga mig þannig að vera á þessu flakki. Það versta er að fjölskyldan er ekki hjá mér. Það er kannski betra að finna stað þar sem ég kem stráknum mínum í skóla og við getum verið öll saman. Þá er þetta auðveldara. Mér er svo sem alveg sama hvar ég verð, ég er orðinn frekar vanur og maður verður hálf háður því að sækja í breytingar þegar maður er alltaf í einhverju nýju og festir hvergi niður rætur.“

„Það eru ekki mörg ár eftir í þessu þannig að ég ætla að reyna að njóta þess á meðan ég get. Svo mun ég líklega setjast að hérna. Þá verður þetta frekar einfalt líf held ég,“ segir Elvar.

Ekki á leið heim

Þau Elvar og Ína eiga von á öðru barni og heyrst hafa orðrómar um heimför í haust, að einhver íslensk lið hafi sett sig í samband við hann.

„Nei, ég hef ekki heyrt í neinum og það er ekki planið að koma heim á næsta ári. Ég ætla að vera áfram úti í nokkur ár í viðbót, meðan ég er upp á mitt besta, að nýta þau ár úti,“ segir Elvar.

Óvíst hvaða Litáar mæta til Íslands

Einstök staða er í riðli Íslands, þar sem öll fjögur liðin eru jöfn að stigum, með þrjú talsins. Ísland fékk tvö stig fyrir frábæran útisigur á Ítalíu í fyrsta leik en fylgdi því eftir með slæmu tapi fyrir Bretum hér heima.

Litáen marði Breta með eins stigs mun í fyrsta leik en tapaði svo með eins stigs mun fyrir Ítölum. Ísland mætir nú Litáen heima og heiman í komandi leikjum. Í Laugardalshöll á föstudag og ytra á mánudag.

Ísland tapaði fyrir Litáen í æfingaleik fyrir EuroBasket í sumar en þá voru NBA-stjörnur Litáa með í för. Þeir leikmenn verða fjarverandi á föstudaginn og óvíst hversu margar stjörnur liðsins í Evrópu koma með til Íslands. Vera má að einhverjar þeirra spili aðeins síðari leikinn ytra.

„Þetta fer svolítið eftir því hvaða mannskap þeir koma með, held ég. Bestu EuroLeague kallarnir þeirra með Zalgiris eru að spila í dag (á miðvikudagskvöld). Svo það er spurning hvort þeir verði með í fyrri leiknum eða bara í seinni leiknum. En hvort sem þeir eru með eða ekki eru þeir stórir og sterkir. Þetta verður erfitt sama hverjir mæta fyrir þá. Þetta er mikil körfuboltaþjóð og þeir kunna alveg körfubolta,“ segir Elvar.

Menn eru þá ákveðnir að vinna sigur í höllinni eftir tap fyrir Bretum í síðasta glugga.

„Við vorum ekki nógu sáttir við sjálfa okkur eftir síðasta leik og við viljum vernda heimavöllinn í næsta leik,“ segir Elvar.

Viðtalið má sjá í heild í spilaranum að neðan.