Klósettferðin sem getur bjargað þér frá því að brenna út í vinnunni

Í Innherja á Vísi í vikunni mátti lesa aðsenda grein um meint mikilvægi skilvirkni.

„Tími er peningar,“ fullyrti höfundur og vísaði í Benjamin Franklin sem sagði þann „sem gæti unnið sér inn tíu skildinga á dag“ en kysi „að sitja á kránni í hálfan dag“ væri „í raun að kasta fimm skildingum beint út um gluggann.“

Miðlaði hann af visku stjórnunarfræðinga sögunnar sem fullyrtu að:

• Annað hvort fjárfestum við tíma okkar eða eyðum honum.
• Sérhver mínúta sem ekki er nýtt er fórnarkostnaður.
• Þeir sem ná árangri hafa ekki fleiri klukkustundir en við hin, þeir stýra þeim bara betur.
• Sífellt fleiri virðast útbrunnir í eigin skipulagsleysi.

Kvað greinarhöfundur tímastjórnun lausn vandans og sagðist enga skemmtilegri þversögn hafa heyrt en fullyrðingar fólks um að það hefði ekki tíma fyrir tímastjórnun.

En er tímastjórnun sá heilagi kaleikur sem stjórnunarfræðingar vilja vera láta?

Alkóhólisti sem fékk borgað fyrir að skrifa um vín

Oliver Burkeman, breskur blaðamaður, varði mörgum árum af lífi sínu í að leita leiða til að spara tíma.

Burkeman skrifaði pistla í dagblaðið Guardian þar sem hann miðlaði ráðum til lesenda um hvernig auka mætti afköst við hið daglega amstur, í vinnunni og frítímanum.

Hann kvaðst hafa verið eins og alkóhólisti sem fékk borgað fyrir að skrifa um vín, stöðugt á höttunum eftir næsta skammti af tímasparnaði.

„Þegar ég prófaði nýja aðferð leið mér eins og gullöld væri við það að hefjast í lífi mínu, full af ró, ótrufluðum afköstum og innihaldsríkri iðju,“ sagði Burkeman sem prófaði meðal annars að skipta deginum í 15 mínútna einingar, svara öllum tölvupóstum um leið og þeir bárust og að búta „to-do“ listann niður í mismunandi dálka.

En gullöldin kom aldrei að sögn Burkemans. Hann varð þvert á móti stressaðri með hverju ráðinu sem hann þáði.

Burkeman ákvað að snúa við blaðinu. Í metsölubók sinni, Fjögur þúsund vikur, varar hann við tímastjórnunarkerfum.

„Sá dagur mun aldrei koma að þér takist að ná tökum á hlutunum,“ segir Burkeman í bókinni.

Bendir hann á að okkur séu aðeins gefnar fjögur þúsund vikur á þessari jörðu, verðum við svo lánsöm að ná áttræðisaldri. Þá staðreynd segir hann ekki skilaboð um að við þurfum að skipuleggja tíma okkar betur heldur þvert á móti að við eigum að sleppa því að gera fleira.

Syndaselur eða vitringur?

„Að vera, eða ekki vera,“ segir í Hamlet. Samtíminn virðist hins vegar hverfast í auknum mæli um „að gera, eða ekki gera“.

Innan vébanda stjórnunarfræða er hinn stærsti syndaselur slæpinginn á kránni.

Frá sjónarhóli annarrar vísindagreinar horfir málið hins vegar öðruvísi við.

Um síðustu aldamót gerðu taugalæknar, sem skoðuðu myndir í heilaskanna, óvænta uppgötvun.

Löngum var talið að lítil virkni ætti sér stað í mannsheilanum þegar við gerum ekki neitt. Þegar myndirnar voru skoðaðar uppgötvaðist hins vegar svo kallaður „hlutlaus gír“ heilans (e. „default mode“).

Í ljós kom að þegar við látum af skipulögðum verkum og hugurinn fær að reika, á sér stað nauðsynleg úrvinnsla í heilanum. Ekki aðeins er þessi vinna mikilvæg fyrir andlega endurnýjun heldur leiðir hún gjarnan til óvæntra tenginga, nýrra hugmynda og lausna á vandamálum sem virtust óyfirstíganleg þar sem við þjösnuðumst áfram í fimmta gír við að finna pistlahugmynd, alveg í spreng því nýjasta tímastjórnunarkerfið kvað á um að við ættum að vinna í tuttugu og fimm mínútna skorpum sem ekki mætti rjúfa.

Tími þinn

Stjórnunarfræðingar líta á tímann sem auðlind sem þarf að virkja. Oliver Burkeman segir tímann líf sem ber að lifa.

Hvort er tími þinn?