Upp­gjörið: Valur - KA 36-31 | Valur náði fljótt for­ystu sem hann lét aldrei af hendi

Valur bar sigurorð af KA, 36-31, þegar liðin leiddu saman hesta sína í N1-höllina að Hlíðarenda í 18. umferð Olís-deildar karla í handbolta i dag.

Valur komst yfir strax í upphafi leiks og jók forskot sitt hægt, rólega og stöðugt í fyrri hálfleik. Staðan í hálfleik var síðan 16-12 Valsmönnum í vil sem höfðu góð tök á þessum leik frá upphafi til enda.

Leikmenn Vals héldu áfram að auka við forystu sína í seinni hálfleik og um miðjan seinni hállfeikinn var staðan 27-20 fyrir Val. KA-menn náðu að narta í hæla Vals og minnkuðu muninn í þrjú mörk, 28-25, þegar Arnór Ísak Haddsson skoraði rúmum tíu mínútum fyrir leikslok.

Þá fundu Valsmenn fjölina á nýjan leik og heimamenn sigldu að lokum sannfærandi fimm marka sigri í höfn. Lokatölur í leiknum urðu 36-31 en þessi sigur Valsliðsins fleytir liðinu á topp deildarinnar.

Valur hefur 28 stig á toppnum en Haukar eru í öðru sæti með 26 stig og FH kemur þar á eftir með sín 25 stig.

ÍBV og Aftureldinga hafa svo 23 stig hvort lið í fjórða til fimmta sæti. KA situr svo í sjötta sætinu með 22 stig.

Ágúst Þór: Orkustigið var gott allan leikinn

„Ég var sáttur við það hvernig við nálguðumst þetta verkefni. Við mættum af gríðarlegum krafti inn í þennan leik og náðum fljótlega undirtökunum. Við spiluðum góða vörn heilt yfir í leiknum og fengum fáar brottvísanir sem er mikilvægt þegar þú er að spila við KA þar sem þeir eru mjög góðir í yfirtölu,“ sagði Ágúst Þór Jóhannsson, þjálfari Vals, léttur líkt og hans er von og vísa að leik loknum.

„Það lögðu margir leikmenn eitthvað í púkkinn og orkustigið í liðinu var einkar gott og það skilaði þessum sigri. Við erum að spila án Magnúsar Óla, Dags Árna og Agnars Smár og ungir leikmenn eins og Gunnar Róbertsson og Dagur Leó eru að taka við keflinu og axla ábyrgð sem er afar jákvætt,,“ sagði Ágúst Þór enn fremur. 

„Liðið er á góðum stað og það hefur verið góður stígandi í spilamennskunni eftir slaka frammistöðu á móti Haukum í fyrsta leiknum eftir landsleikjahléið. Við vorum flatir í þeim leik en höfum stigið upp eftir það og ég er ánægður með stöðuna,“ sagði hann. 

„Við þurfum hins vegar að halda vel á spilunum og nú er bara að endurheimta eftir þennan bardaga og búa okkur vel undir næsta leik. Það er alltaf eitthvað sem er hægt að bæta og við stefnum að því að bæta okkur leik frá leik,“ sagði Ágúst um framhaldið. 

Andri Snær: Varnaleikurinn ekki nógu öflugur framan af leik

„Varnarleikurinn var ekki nógu góður í fyrri hálfleik og af þeim sökum grófum við okkur ofan í holu sem er erfitt gegn jafn sterku liði og Valur hefur á að skipa. Það vantaði upp á grimmd og við náðum ekki loka þeim glufum sem við ætluðum og það er svekkjandi,“ sagði Andri Snær Stefánsson, þjálfari KA, eftir leik.

„Varnarleikirinn var þéttari í seinni hálfleik og við náðum að koma okkur inn í leikinn. Því miður náðum við ekki að snúa taflinu okkur í vil en það bara áfram gakk eftir þetta tap,“ sagði Andri Snær þar að auki. 

„Til þess að bæta gráu ofan á svart missum við Morten Linder. Mig grunar að hann hafi farið úr axlarlið og það er vont ef að við missum hann út í næstu leikjum okkar,“ sagði hann. 

„Nú er bara að koma okkur upp á hestinn aftur. Það eru spennandi verkefni fram undan bæði í deild og bikar og við hlökkum til þeirra. Við höfum verið að spila vel eftir áramót og erum með hörkulið sem getur gert skemmtilega hlut það sem eftir lifir tímabils,“ sagði Andri um komandi tíma hjá norðanmönnum.