Refsað tvisvar vegna sama brots en vika leið á milli

Agravanis tekur út eins leiks bann í kvöld gegn Njarðvík, eftir að hafa fengið að spila bikarúrslitaleikinn við KR á laugardag þrátt fyrir brot sitt í undanúrslitaleik við Keflavík fjórum dögum fyrr.

En af hverju fékk Grikkinn 20 þúsund króna sekt á miðvikudaginn í síðustu viku, og svo líka 40 þúsund króna sekt og eins leiks bann í gær?

Þannig er mál með vexti að 20 þúsund króna sektin var ekki bara vegna hnefahöggsins. Þar var um að ræða refsingu fyrir „4 tæknivillur“ á leiktíðinni. Agravanis fékk eina tæknivillu í leiknum við Keflavík og svo brottrekstrarvilluna, sem telst sem tvær tæknivillur, og hafði verið búinn að fá tæknivillu fyrr á leiktíðinni.

Þessar sektir, sem eru vegna uppsafnaðra tæknivillna, fara ekki inn á borð aga- og úrskurðarnefndar enda reglurnar um þær einfaldar. Hægt er að útdeila þeim nánast sjálfvirkt. Það er ástæðan fyrir því að 20 þúsund króna sektin á Agravanis kom viku fyrr en hin raunverulega refsing vegna hnefahöggsins, sem byggði á skýrslu frá dómurum leiksins.

Það var svo aga- og úrskurðarnefnd sem dæmdi Agravanis í eins leiks bann og veitti honum 40 þúsund króna sekt, eftir fund sinn í þessari viku. Á vikulegum fundum nefndarinnar eru tekin fyrir mál sem borist hafa fyrir miðnætti mánudaginn á undan, samkvæmt reglum, og því var málið ekki tekið fyrir á milli undanúrslita- og úrslitaleiks bikarkeppninnar. Það hefði hins vegar verið gert ef komið væri í úrslitakeppni í Bónus-deildinni því þá gilda sérstakar reglur um að nefndin fundi á milli leikja.

Miðað við viðbrögðin í körfuboltahreyfingunni má búast við að reglunum verði breytt svo að hið sama gildi á lokastigum bikarkeppni eins og í úrslitakeppni.