Í­þrótta­fólk forðast kyn­líf af ótta við að falla á lyfja­prófi

Tíundi hver norrænn landsliðsmaður í vetraríþróttum stundar þannig ekki kynlíf og ástæðan er ótti við að falla á lyfjaprófi.

Tilgangur rannsóknarinnar var að kanna hvað íþróttafólkið velur frá sér af ótta við að fá í sig bannað efni. Aftonbladet í Svíþjóð fjallar um niðurstöðurnar.

Þar kom í ljós að tíu prósent svarenda forðast kynferðislegt og/eða náið samneyti alfarið af þeirri ástæðu. 14,3 prósent svara að þau forðist það stundum. Samtals er það því næstum fjórðungur íþróttafólksins.

Meðal íþróttafólks í Noregi var efasemdin mest. Þar velja næstum 33 prósent, eða þriðjungur, kynlíf frá sér vegna hættu á að næla sér í óæskilega ólögleg efni.

„Hingað til hef ég ekki hugsað út í það“

Norska skíðagöngugoðsögnin Therese Johaug telur að þetta sé eitthvað sem maður verði að vera meðvitaður um. Landsliðskona hennar, , er hins vegar ómeðvituð.

„Hingað til hef ég ekki hugsað út í það en kannski ætti maður að gera það,“ sagði Tiril Udnes Weng við NRK.

Í samtali við sænska ríkisútvarpið segir sænski skíðaskotfimimaðurinn Sebastian Samuelsson að hann hafi ekki áhyggjur.

„Ég treysti sambýliskonunni“

„Mér finnst þetta hljóma eins og léleg afsökun (ef maður fellur á lyfjaprófi). En stundum tekst fólki að komast upp með þá afsökun, svo ég geri ráð fyrir að það sé eitthvað til í því – en ég treysti sambýliskonunni,“ sagði Samuelsson.

Óttinn við að fá í sig lyfjaflokkuð efni hefur aukist síðan lyfjahneyksli Johaug kom upp árið 2016. Hún hafði þá notað varasalva fyrir sólbrunnar varir sem innihélt ólöglegt efni, sem hún segist ekki hafa haft neina hugmynd um. Skíðastjarnan var sett í átján mánaða bann og missti af bæði HM og Ólympíuleikum.

Síðan þá hefur hún ekki tekið lyf eða einu sinni fengið deyfingu hjá tannlækni að óþörfu eða án þess að vita nákvæmlega hvað það inniheldur.

Ekki alveg ástæðulaus ótti

Og óttinn við að fá í sig ólögleg efni með kynlífi er heldur ekki alveg ástæðulaus. Svissneska Imogen Simmonds lenti einmitt í því í desember 2024, þegar þríþrautarkonan féll á lyfjaprófi fyrir bannaða efnið Ligandrol.

Eftirfarandi rannsókn leiddi í ljós að hún hafði fengið efnið í sig eftir að hafa stundað kynlíf með kærasta sínum sem tók fæðubótarefni sem innihéldu efnið, án vitundar Simmonds.

Norska frístílsskíðamanninum Birk Ruud brá þó í brún þegar hann heyrði að þriðjungur landsliðsfélaga hans velur nánd frá sér.

„Það kom mjög á óvart að heyra þetta! Þau setja íþróttina í fyrsta sæti og ég virði það. Þá ertu að minnsta kosti „locked-in“,“ sagði Birk Ruud.

Könnunin var send til alls 413 einstaklinga, þar af svöruðu 45 prósent þeirra.

Vetrarólympíuleikarnir 2026 hefjast 6. febrúar næstkomandi.