Aukning loðnukvótans hittir á svelta markaði

Í fréttum Sýnar mátti sjá myndir frá Norðfirði sem er eina höfnin sem fengið hefur loðnu á þessari vertíð. Í morgun kom Barði NK með tæp 900 tonn til vinnslu í fiskiðjuveri Síldarvinnslunnar. Þegar skipið hélt út á miðin á mánudag var íslenski kvótinn 31 þúsund tonn en fer núna yfir 150 þúsund tonn.

„Þetta eru náttúrulega gleðitíðindi að við séum að fá fimmföldun á okkar kvóta. Þannig að þetta er ánægjulegt,“ segir Gunnþór Ingvason, forstjóri Síldarvinnslunnar og formaður Samtaka fyrirtækja í sjávarútvegi.

„Við erum að sjá það fram á að geta framleitt núna inn á okkar verðmætustu markaði, inn á Asíumarkað og Austur-Evrópu, og svo loðnuhrogn. Við höfum ekki verið að sinna þessum mörkuðum að neinu viti síðustu árin vegna loðnuskorts. Þannig að það er gríðarlega mikilvægt að ná að viðhalda þessum mörkuðum og fá þetta inn núna.“

-Þýðir þetta að verðin eru góð?

„Já, ég held við séum að fara í tóma markaði. Já, ég held ég sjái bara gott útlit.“

Miðað við fyrri kvóta hafði Gunnþór áætlað að útflutningsverðmætið gæti orðið allt að tíu milljarðar króna. En hvað segir hann núna?

„Ég myndi skjóta svona á 35 til 40 milljarða króna vertíð. Og það munar um minna,“ svarar Gunnþór.

Hann telur þó að útgerðir loðnuskipa muni bíða átekta þar til hrognafylling loðnunnar verður meiri.

„Og þetta fari í okkar verðmætustu flokka. Það er alveg ljóst að þessi kvóti er ekki það mikill að það er ekki svigrúm til þess að vera að veiða loðnu með beinum hætti í fiskimjöl og lýsi. Þannig að menn munu bíða eftir hrognafyllingu og manneldismörkuðunum.“

Sem gæti gerst eftir tvær vikur eða svo. Þá ætti loðnan að vera farin að ganga meðfram suðurströndinni.

-Hvað þýðir þetta fyrir stemninguna í loðnubyggðum landsins?

„Ég held að þetta sé náttúrulega gríðarleg lyftistöng. Það eru auðvitað hundruð manna sem fá vinnu þennan einn og hálfan mánuð sem þetta mun taka okkur að koma þessu í verðmæti. Og það eru margir sem fá sneið af kökunni,“ svarar forstjóri Síldarvinnslunar á Norðfirði.

En er hugsanlegt að loðnukvótinn gæti orðið enn meiri? Þeim möguleika er velt upp hér í frétt Sýnar: