Svindluðu á þol­prófi og fá ekki að dæma á EM

Evrópska handboltasambandið, EHF, tilkynnti um ákvörðunina í dag.

Samkvæmt reglum sambandsins þurfa dómarar að standast þolpróf til að mega dæma á EM. Slíkt próf er hægt að taka hvar sem er, svo lengi sem dómararnir skila inn gögnum til sambandsins sem sanna að þeir hafi staðist prófið.

Þeir Nikolov og Nachevski skiluðu einn myndböndum af sér við eitt prófanna, annars vegar átta vikum fyrir mót og hins vegar fjórum vikum fyrir mót. Fyrirtækið Fitgood Pro, samstarfsaðili EHF þegar kemur að heilbrigðismálum, fór yfir myndskeiðin sem þeir félagar skiluðu inn.

Sambandið fékk að vita af því í lok desember að líklega hefði verið átt við myndefnið. Það sýni því ekki raunverulega frammistöðu þeirra á prófinu. Frekari rannsókn var gerð á myndefninu og niðurstaðan sú að dómararnir hefðu skilað inn fölsuðum myndböndum við prófið.

Af þeim sökum hefur EHF tekið þá ákvörðun að draga tilnefningu Nikolov og Nachevski til baka og munu þeir því ekki dæma á komandi Evrópumóti sem fram fer í Danmörku, Noregi og Svíþjóð.

Þeir voru á meðal 18 dómarapara sem áttu að dæma á mótinu en þau verða nú 17 talsins. Þar á meðal eru Anton Gylfi Pálsson og Jónas Elíasson.

Fram kemur í yfirlýsingu EHF að málið verði kannað frekar í framhaldinu.

Þetta er ekki í fyrsta sinn sem Nikolov og Nachevski eru sakaðir um siðferðislega bresti í starfi. Í rannsóknarheimildaþætti TV2 árið 2023 voru þeir bendlaðir við hagræðingu úrslita.

Það fékkst þó ekki sannað og þeir félagar dæmt án vandræða síðan.