Vaktin: Maduro hand­tekinn eftir á­rás á Venesúela

Íbúar höfuðborgarinnar Karakas í Venesúela vöknuðu við sprengingar skömmu fyrir klukkan 2 að staðartíma í morgun (kl. 6 að íslenskum tíma). Herflugvélum var flogið yfir borgina og reykur sást rísa upp úr herstöðvum, þar á meðal bækistöðum flughersins í Tiega Fierta og herstöðinni La Carlota. 

Í vaktinni í dag var fylgst með öllum helstu vendingum.

Trump staðfesti í morgun að Maduro hefði verið handtekinn ásamt eiginkonu sinni og þau flutt úr landi. Venesúelski forsetinn hafði skrifað í yfirlýsingu að árásin væri „grafalvarleg hernarðaraðgerð“.

Sjá meira: Fréttir af stöðunni í Venesúela

Pam Bondi, dómsmálaráðherra Bandaríkjanna, skrifar á X að Maduro hafi verið ákærður í New York-ríki fyrir fíkniefnahryðjuverk, kókaíninnflutning og vopnahald.

„Þetta var snilldaraðgerð,“ sagði Donald Trump við New York Times í dag. Bandaríkin hafa á síðustu mánuðum ráðist á 35 venesúelska báta sem bandarísk yfirvöld höfðu sagt flytja inn eiturlyf til Bandaríkjanna. Bandaríkjaher er talinn hafa drepið um hundrað manns í árásum á báta síðustu vikur.

Hér er það helsta í lok dags 3. janúar:

• Öryggisráð Sameinuðu þjóðanna heldur neyðarfund á mánudag
• Delcy Rodríguez varaforseti kom fram í sjónvarpi og útvarpi og gekk þvert á orð Trump um að hún hefði tekið við stjórnartaumunum í eins konar leppstjórn. Hún sagði Maduro „eina forseta Venesúela“ og hvatti þjóðina til að veita viðnám.
• Þorgerður Katrín Gunnarsdóttir utanríkisráðherra vildi ekki fordæma árásina og svaraði ekki spurningum um það hvort þær fælu í sér brot á alþjóðalögum.
• Trump og Marco Rubio utanríkisráðherra ýjuðu að því að Kúbverjar væru næstir í röðinni en hvorugur gaf skýr heit um það.
• Trump sagði á blaðamannafundi í dag að bandarísk olíufyrirtæki kæmu til með að taka yfir olíuiðnað Venesúela. Innviðir yrðu reistir við og færðir í betra horf. Bandaríkin færu sömuleiðis með öll völd í landinu um óákveðinn tíma.
• António Guterres aðalritari Sameinuðu þjóðanna fordæmdi aðgerðirnar og sagði þær líklega brjóta gegn stofnsáttmála SÞ. Leiðtogar í Evrópu og Íslandi hafa ekki gengið svo hart fram.
• Trump gaf það einnig í skyn að María Corina Machado, venesúelanski stjórnarandstöðuleiðtoginn sem hlaut friðarverðlaun Nóbels í vetur, kæmi ekki að stjórn landsins. Hann sagði hana skorta stuðning meðal þjóðarinnar.