„Við vorum sjálfum okkur verstir“

„Fyrst og fremst voru meiri gæði í Valsliðinu en hjá okkur. Við vorum sjálfum okkur verstir í lok fyrri hálfleiks þegar leikurinn í járnum og einhverju leyti hefði ég viljað að vera með frumkvæðið á fyrstu 15 til 20 mínútunum.“

„Við erum að fara rosalega illa með upplögð marktækifæri, vítaköst og opin færi á línu. Á sama tíma er engin markvarsla hjá okkur. Ég hefði viljað sjá okkur vera minnsta kosti að leiða eftir 20 mínútur og vera með betri stöðu í hálfleik,“ sagði Einar skömmu eftir leik.

Jafnræði var með liðunum framan af fyrri hálfleik en þegar á leið fór að síga á ógæfuhliðina hjá Fram. Sóknarleikurinn var þokkalegur að sögn Einars Jónssonar, en var fremur ósáttur með varnarleikinn.

„Þetta eru sjö mörk í hálfleik og töpum með níu. Seinni hálfleikur litaðist af því að þetta var aldrei í hættu fyrir Valsara og við vorum að reyna nota þá sem eru heilir hjá okkur.“

„Ég get tekið fullt jákvætt út úr þessu, sérstaklega sóknarlega. Varnarlega vorum við í basli, stóðum fína vörn fyrstu 20 mínúturnar en þá er ekki klukkaður bolti. Við vorum að fá skotin sem við vildum fá en svo hrynur vörnin líka eftir það.“

Fram lék með sjö leikmenn í sókn á löngum kafla í fyrri hálfleik, en það gekk illa og liðið fékk nokkur ódýr mörk á sig í kjölfarið. Einar segir að slíkt sé einfaldlega fórnarkostnaðurinn við að spila þessa uppstillingu.

„Við erum bara að spila þetta og þetta var fórnarkostnaðurinn. Við vorum klaufar og vorum að kasta boltanum frá okkur síðustu mínúturnar í fyrri hálfleik. Ég hefði viljað sjá okkur gera betur en við stöndum og föllum með því, svona er þetta bara.“

Arnór Snær lék á als oddi

Arnór Snær Óskarsson lék sinn fyrsta leik fyrir Val á tímabilinu í kvöld eftir að hafa gengið til liðs við félagið á dögunum. Framarar áttu í miklu basli með Arnór, sem skoraði ellefu mörk í leiknum.

„Hann var frábær og enginn smá fengur fyrir Valsarana. Maður sá það á honum, hann vildi þetta og var í miklum ham. Við réðum ekkert við hann,“ sagði Einar að lokum.