„Ekki bara steypa heldur fólk og fram­tíð“

Sjálfbærni og vistvænni lausnir

„Við erum að nálgast hlutina í samræmi við okkar markmið í umhverfismálum,“ segir Emil Austmann Kristinsson, framkvæmdastjóri sölusviðs BM Vallár. Fyrirtækið hefur síðastliðin ár sett umhverfismál og sjálfbærni í forgang og hlotið fyrir það tvær viðurkenningar á sviði umhverfismála, Kuðunginn og Umhverfisfyrirtæki SA.

BM Vallá býður meðal annars upp á Berglindi, vistvænni steypu með allt að 45 prósent minna kolefnisspor en hefðbundin steypa samkvæmt kröfum byggingarreglugerðar. Þá leggur fyrirtækið mikið upp úr vottuðum umhverfisyfirlýsingum (EPD) til að geta veitt staðlaðar og gagnsæjar upplýsingar um umhverfisáhrif vörunnar yfir lífsferil hennar.

Endurvinnsla og nýting hráefna

Nýja steypustöðin á Reykjanesi verður staðsett að Ferjutröð 11, Ásbrú, er búin tæknilegri endurvinnslustöð sem gerir mögulegt að endurvinna bæði umfram- og afgangssteypu.

„Fram að þessu höfum við notað afgangssteypu sem verður eftir í bílunum í aðrar vörur, meðal annars styrkta hleðslukubba. Við verðum áfram í því en með nýju stöðinni munum við geta skolað út steypuna og endurnýtt skolvatnið í næstu hræru. Engin óæskileg efni fara út í fráveitukerfið og við endurvinnum mölina einnig,“ segir Emil. „Við eigum ekki að þurfa að farga neinu sem er í samræmi við okkar áherslur á hringrásarlausnir.“

Hitunarkerfi knúið metangasi

Nýja stöðin er búin hitunarkerfi, gufukatli sem gengur bæði fyrir dísilolíu og metangasi frá Sorpu. Hitunarkerfið skiptir höfuðmáli við íslenskar aðstæður þegar bræða þarf frostköggla úr möl við framleiðsluna. Metangas er hluti af hringrásarhagkerfinu sem bætir nýtingu úrgangs og er umhverfisvænni orkugjafi.

Þessi nálgun er í takt við alþjóðlega þróun þar sem sífellt fleiri lönd setja kvaðir á fyrirtæki um að draga úr kolefnisspori. Emil bendir á að það sé aðeins tímaspursmál hvenær Ísland fylgi í kjölfarið með sambærilegar reglur. 

„Hringrásarhagkerfið er nauðsynlegt í dag og fyrirtæki þurfa að bera ábyrgð. BM Vallá ætlar að vera í fararbroddi í þessum efnum enda stefnum við ótrauð á kolefnishlutleysi í starfseminni innan fimm ára.“ 

BM Vallá býður á stórleik í boltanum 29. ágúst

„Við erum mjög spennt að koma í Reykjanesbæ og erum sannfærð um að starfsemin verði íbúum og fyrirtækjum á svæðinu til hagsbóta. Við höfum lengi fengið ábendingar frá viðskiptavinum okkar á Suðurnesjum um að koma nær þeim. Reykjanesbær er í mikilli uppbyggingu; þar er flugvöllurinn, fiskeldisverkefni, íbúðabyggingar og stórar framkvæmdir. Við viljum vera til staðar og taka þátt í þeirri þróun,“ segir Emil. 

BM Vallá ætli sér að taka virkan þátt í samfélaginu og í tilefni af opnun nýju steypustöðvarinnar mun fyrirtækið bjóða íbúum á Suðurnesjum á stórleik Njarðvíkur og Leiknis í knattspyrnu. Leikurinn er heimaleikur Njarðvíkur og fer fram 29. ágúst næstkomandi.

„Við erum í fólkbransanum“

„Við viljum vinna með íþróttafélögum og styrkja tengsl okkar við íbúa. Þetta er liður í því að vera virkur þátttakandi í samfélaginu, ekki bara þjónustuaðili,“ segir Emil og leggur áherslu á að fyrirtækið snúist ekki bara um tóma steypu.

„Það er algengur misskilningur að við séum eingöngu í steypubransanum. 

Við erum í "fólk-bransanum". Við vinnum með fólki sem setur aleiguna í heimili sitt, verktökum sem ráðast í stórar framkvæmdir svo húsnæði verði til og fólki sem vinnur störfin, dælir steypunni og byggir húsin - allt þetta fyrir fólk. 

Við þekkjum vel þessa tilfinningu að sjá eitthvað byggjast upp, standa fyrir framan tóman reit og svo eftir blóð, svita og tár er kominn veggur, svo heilt hús og geta að lokum labbað inn með tannburstann sinn. Sú tilfinning er engu lík.“

Þjónusta fyrir vaxandi samfélag

Síðustu mánuði hefur verið unnið að umfangsmiklum jarðvinnu- og steypuframkvæmdum á lóðinni við Ferjutröð 11 á Ásbrúarsvæðinu; gólfplata steypt, sex efnishólf reist og undirstöður fyrir vigtarband og þrjú síló sett upp. Skipulags- og deiliskipulagsvinnu ásamt leyfisveitingum lauk í sumar og segir Emil mikla tilhlökkun í verbúðum BM Vallár.

Nýja steypustöðin kemur frá þýska framleiðandanum Nisbau og mun þjónusta byggingaverktaka og einstaklinga í Keflavík, Njarðvík, Höfnum, Sandgerði, Garði, Vogum ásamt Hafnarfirði. Ráðgert er að afhending steypu frá Reykjanes bæ hefjist í haust.

Nánari upplýsingar um verð, þjónustu og lausnir sem henta mannvirkjagerð og framkvæmdum í Reykjanesbæ má sjá á vefsíðu BM Vallár.